Nga Kievi ka sinjale pozitive se në një të ardhme të afërt Ukraina mund ta njoh pavarësinë e Kosovës.
Deputeti ukrainas, Oleksandr Merezhko, i cili është edhe shef i Komisionit për Punë të Jashtme të Parlamentit të Ukrainës, tregon se si kanë krijuar një simpati për Kosovën, prej kur shteti më i ri në Evropë, i doli në mbështetje Ukrainës duke i vënë sanksione Rusisë.
Merezhko, thotë se prej që ka filluar agresioni ushtarak i Rusisë, ata e kanë kuptuar se kush janë miqtë e vërtetë të Ukrainës.
“Kam fituar një simpati për Kosovën pas datës 24 shkurt kur filloi agresioni ushtarak i Rusisë mbi Ukrainën. Ne e kemi parë shumë qartë se kush janë miqtë tanë të vërtetë edhe kush janë kundërshtarët tanë. Kosova i ka vënë sanksione Rusisë si dhe shumë deputetë të Kuvendit e kanë ngritur zërin në mbështetje të Ukrainës. Është për t’u vlerësuar kur dikush dëshiron të bëhet shoku yt kur t’i ke më së shumti nevojë, prandaj edhe ne duhet të bëjmë diçka. Unë e nënshkrova atë letër sepse jemi të shqetësuar për situatën e sigurisë në Kosovë. Ne nuk duam në asnjë formë që Rusia ta destabilizojë vendin”, tha Merezhko për Tëvë1.
Ai tregon se ka diskutuar me disa deputetë të Parlamentit të Ukrainës, për mundësinë e njohjes së pavarësisë së Kosovës.
Mirëpo lidhur më këtë çështje vendimi final i takon presidentit ukrainas, Volodymyr Zelensky.
“Unë me disa deputetë të tjerë të Parlamentit të Ukrainës kemi diskutuar për mundësinë e njohjes së pavarësisë së Kosovës, por në dorë këtë vendim e ka Presidenti i vendit, Volodymyr Zelensky. Ne nuk mund ta injorojmë faktin se Kosova na ka mbështetur pa rezervë dhe se miqtë tanë ndërkombëtarë tashme e kanë njohur pavarësinë e Kosovës. Arsyeja tjetër e fortë është se edhe ne sikurse Kosova aspirojmë që një ditë të bëhemi pjesë e Bashkimit Evropian”, shtoi ai.
Oleksandr Merezhko, ishte njëri nga nënshkruesit e letrës ku kërkohet një qasje më e balancuar nga Perëndimi në marrëdhëniet mes Kosovës dhe Serbisë.
