Deputeti nga koalicioni i Frontit Evropian, në Parlamentin e Maqedonisë së Veriut, Skender Rexhepi, ka kërkuar votimin në Kuvend të Rezolutës për Krizën Humanitare në Rripin e Gazës.
Në fjalën e tij para deputetëve, Rexhepi u bëri thirrje të gjithë anëtarëve të Kuvendit që të mbështesin rezolutën e propozuar më parë nga Fronti Evropian, duke theksuar se situata aktuale në Gaza është e krahasueshme me tragjeditë më të errëta të historisë.
“Sot në Gaza është kampi më i madh i përqëndrimit, duke ia kaluar edhe atij të Auschwitz-it” tha ai, duke iu referuar kampit famëkeq nazist gjatë Luftës së Dytë Botërore.
Gjatë fjalimit të tij, Rexhepi shfaqi fotografi të fëmijëve palestinezë të vdekur nga uria në ditët e fundit, duke i bërë apel ndërgjegjes së deputetëve që të mos qëndrojnë indiferentë përballë vuajtjes së civilëve.
Ai kërkoi që rezoluta të miratohet si një akt i humanizmit dhe solidaritetit ndërkombëtar.
Deputeti gjithashtu u bëri thirrje për mobilizim edhe Bashkësisë Fetare Islame në Maqedoninë e Veriut, duke i kërkuar që të organizojë protesta masive dhe të iniciojë fushata për mbledhjen e fondeve që do të shkonin në ndihmë të civilëve palestinezë.
Kjo nuk është hera e parë që Rexhepi ngre çështjen e Gazës në Kuvend. Ai ka kërkuar në mënyrë të përsëritur që Maqedonia e Veriut të miratojë një qëndrim të qartë përballë krizës humanitare në territorin palestinez./teve1/
