Deputeti i Lëvizjes Vetëvendosje, Valon Hoti, në emisionin “Këndi i debatit” në Tëvë1, ka folur për situatën aktuale lidhur me zgjedhjen e presidentit, duke theksuar se, ndonëse ka përpjekje nga ana e kryeministrit Albin Kurti, ende nuk ka rezultate konkrete.
Hoti u shpreh se, bazuar në qëndrimet e partive opozitare dhe zhvillimet e fundit, situata nuk duket shumë premtuese, por kjo nuk nënkupton dorëzim nga përpjekjet për arritjen e një marrëveshjeje.
“Në bazë të deklarimeve dhe qëndrimeve të kryetarëve të partive opozitare, por tash edhe të kryeministrit, situata nuk është edhe shumë shpresëdhënëse, por jo për të hequr dorë nga angazhimi për të zgjedhur presidentin,” ka deklaruar Hoti.
Ai ka kritikuar opozitën për mungesë të propozimeve konkrete, duke thënë se, sipas tij, qëndrimi i tyre ka qenë bllokues.
“Nuk kemi parë një pozicion nga këto 30 ditë, ndoshta edhe më herët. Ata kanë një qëndrim që është krejt bllokues: nuk kanë dhënë asnjë emër, nuk kanë dhënë asnjë ofertë dhe ndërkohë nuk pranojnë asnjërën prej ofertave që ne i kemi dhënë. Ata nuk bëjnë asnjë hap, ndërkohë që ne kemi bërë të paktën pesë hapa,” ka thënë ai.
Sipas Hotit, Lëvizja Vetëvendosje ka tentuar disa opsione për kompromis, përfshirë propozimin për kandidat konsensual dhe oferta për bashkëpunim institucional.
“Tentuam me kandidat konsensual, tentuam të japim kryetarin e Kuvendit për PDK-në dhe LDK-në, madje ka pasur edhe ofertë për bashkëqeverisje,” ka shtuar Hoti.
Ai përfundoi se, pavarësisht vështirësive, përpjekjet për të gjetur një zgjidhje pa shkuar në zgjedhje do të vazhdojnë.
