Deputeti i Lëvizjen Vetëvendosje Arbër Rexhaj, në emisionin “InfoNata” në Tëvë1, e ka cilësuar gabim takimin e Nexhmedin Spahiut me ministrin e Jashtëm të Serbisë Marko Gjuriq.
Sipas Rexhajt, ky takim fare nuk do të duhej të ndodhte, ngase për këtë punë janë zyrtarët shtetëror.
“Zakonisht takimi me krerët e Serbisë, i një shteti fashist e gjenocidal ndaj Republikës së Kosovës, mund të bëhet përmes përfaqësuesve politikë. Mendoj që takimi ka qenë gabim. Ne kemi përfaqësues që janë të obliguar të dialogojnë, sikur të mos kishte obligim në kuptimin e negociatave me Serbinë as Kurti nuk do të shkonte”, ka thënë Rexhaj.
Profesori Nexhmedin Spahiu të shtunën kishte njoftuar për takimin që e kishte zhvilluar me ministrin serb Gjuriq në zyrën e tij në Beograd.
Të hënën Spahiu në “InfoNata”, ka thënë se aty u fol për dialogun, marrëdhëniet ndëretnike e tema të tjera, duke e cilësuar të rëndësishëm për shtetin e Kosovës.
Ndër të tjera, Spahiu ka thënë se Gjuriqit ia ka kërkuar që Serbia është mirë që sa më parë ta njohë Kosovën. Ky takim ka ngjallë reagime të shumta në Kosovë.
