Deputeti i Aleancës për Ardhmërinë e Kosovës, Bekë Berisha, ka reaguar pas vdekjes së 27-vjeçarit nga Lipjani, rast ky që ka ngritur shqetësime në opinion publik dhe familjarët e të ndjerit, të cilët pretendojnë se ai ka humbur jetën si pasojë e dhunës së ushtruar nga Policia e Kosovës.
Përmes një reagimi publik, Berisha ka kërkuar një hetim të pavarur dhe transparent lidhur me këtë ngjarje tragjike.
“Me dhimbje dhe shqetësim të thellë mora lajmin për ndarjen tragjike nga jeta të të riut Agon Zejnullahu në Lipjan, në rrethana që ngrisin shumë pikëpyetje dhe kërkojnë përgjigje të menjëhershme. Respekti për jetën e njeriut është themeli i çdo rendi demokratik dhe ligjor. Askush nuk është mbi ligjin, as qytetari, as polici”, ka shkruar Berisha.
Ai ka bërë thirrje për:
Hetim të pavarur dhe transparent nga organet përkatëse, përfshirë Inspektoratin Policor të Kosovës (IPK) dhe Prokurorinë e Shtetit;
Zbulimin e plotë të rrethanave që çuan në vdekjen e Zejnullahut;
Ndëshkimin e kujtdo që ka tejkaluar kompetencat apo ka vepruar në kundërshtim me ligjin.
Në fund, deputeti Berisha i ka shprehur ngushëllimet e tij familjes së të ndjerit, duke theksuar se rasti nuk duhet të mbulohet me heshtje dhe se drejtësia duhet të vihet në vend.
