Deputetja e Lëvizjes Vetëvendosje, Fitore Pacolli, ka komentuar dështimin e sotëm të votimit për mandatarin Glauk Konjufca në emisionin “Këndi i Debatit” në Tëvë1. Ajo tha se Vetëvendosja ka qenë e përgjegjshme në çdo hap dhe se fajin për mosformimin e qeverisë duhet ta mbajë opozita.
E pyetur nëse deputetët e shumicës duhet të ndihen përgjegjës për situatën e krijuar, Pacolli mohoi kategorikisht.
“Unë mendoj që asnjë deputet i LVV-së nuk duhet, as nuk ka pse të ndihet fajtor, sepse ne kemi qenë aty sa herë që na është kërkuar të jemi dhe kemi participuar në votim,” tha Pacolli.
Ajo theksoi se Vetëvendosja ka zhvilluar diskutime edhe me deputetë të opozitës, por përgjegjësia për dështimin, sipas saj, bie mbi ta.
“Ata të cilët duhet të ndihen fajtorë janë deputetët e opozitës, të cilët asnjëherë nuk e kanë kryer punën me përgjegjësi që ua ka dhënë qytetari. Prandaj, ata duhet të ndëshkohen. Ne, deputetët e VV-së, kemi qenë aty prej ditës së parë, asnjëherë nuk kemi munguar dhe asnjëherë nuk kemi refuzuar t’i kryejmë detyrat tona,” theksoi ajo.
Pacolli tha gjithashtu se në rast të votimit të fshehtë, Vetëvendosja beson se votat do të siguroheshin, por sipas saj, deputetët e opozitës janë kontrolluar nga partitë e tyre.
“Nëse shkonim me votim të mbyllur, ne do t’i kishim votat, pasi disa kanë thënë se do të votojnë. Por në fund pamë që ka pasur kontroll mbi deputetët e partive të tyre dhe nuk i kanë lënë të votojnë. Prandaj jemi këtu, dhe do të shkojmë në zgjedhje,” u shpreh Pacolli.
