Gjykata Themelore në Gjilan i ka dënuar me 71 vjet burgim pesë të akuzuarit akuzuarit B.I., S.I., F.I., I.I dhe I.I, për vrasjen e M.I , në fshatin Sadovinë e Qerkezëve në Komunën e Vitisë.
Ndërsa i akuzuari E.I. është liruar nga akuzat.
Vrasja e cila kishte ndodhur më 2 maj të vitit 2019 kishte nisur për shkak të një kontesti pronësor.
“I ndjeri me familjarët e tij dalin që të bisedojnë me të akuzuarit për të arritur një marrëveshje, por të akuzuarit refuzojnë dhe më pas vazhdojnë me fyerje, duke eskaluar situata në konflikt fizik dhe me mjete të forta mprehëse si drurë dhe shufra metalike, e godasin tani të ndjerin në kokë dhe pjesë të ndryshme të trupit. Fillimisht i akuzuari S.I. e godet në pjesën e pasme të kokës, pas tij edhe i akuzuari F. I. e godet pas kokës dhe në fund edhe i akuzuari B.I. godet 2-3 herë në këtë mënyrë”, thuhet në njoftimin e gjykatës, përcjell teve1.info.
Gjykata, të akuzuarit B.I., S.I. dhe F.I. i ka dënuar me nga 21 vjet burgim, dënime që do të ekzekutohen pas aktgjykimit të formës së prerë.
Dy të akuzuarit tjerë I.I, I.I ( të dytë me iniciale të njëjta), për veprën penale “lëndim i lehtë trupor”, i ka dënuar me nga 4 vjet burgim.
