Deputetët e Kosovës kanë reaguar pozitivisht ndaj vendimit të Gjykatës Themelore në Prishtinë për rastin “Banjska”, ku dy persona janë dënuar me burgim të përjetshëm për sulmin terrorist të shtatorit 2023 dhe një tjetër me 30 vite burgim.
Lajmi për vendimin u prit me duartrokitje në Kuvendin e Kosovës menjëherë pas publikimit të tij.
Kryetarja e Kuvendit, Albulena Haxhiu, e përshëndeti vendimin duke e cilësuar si një hap të rëndësishëm drejt vendosjes së drejtësisë.
“Përshëndes vendimin e Gjykatës Themelore për dënimin me burgim të përjetshëm për sulmin terrorist në Banjskë”, deklaroi ajo.
Megjithatë, sipas Haxhiut, drejtësia për këtë rast ende nuk është përmbushur plotësisht.
“Ajo do të përmbyllet vetëm kur kryeterroristi Milan Radoiçiq të transferohet në Republikën e Kosovës bashkë me të tjerët e përfshirë. Lavdi heroit të Kosovës, rreshterit Afrim Bunjaku”, theksoi ajo.
