Gjykata Themelore në Ferizaj sot do të mbajë seancën e shpalljes së aktgjykimit ndaj Dardan Krivaqës dhe Arbër Sejdiut, të cilët akuzohen për dhunimin dhe vrasjen e Marigona Osmanit.
Para fillimit të seancës, Kolektivi për Mendim dhe Veprim Feminisist ka filluar protestë duke kërkuar drejtësi dhe ndëshkim maksimal për Krivaqën dhe Sejdiun, përcjell teve1.info
Aktivistja e këtij grupi, Bjeshka Guri tha se janë skeptike rreth vendimit që do të japë Gjykata, ndonëse presin dënim maksimal.
“Shteti duhet ta drejtojë femicidin si urgjencë shtetërore…ne këtu do të qëndrojmë derisa të shpallet aktgjykimi dhe do të vazhdojmë rezistencën çfarëdo vendimi që të merret…prej vendimit të sotëm presim dënim maksimal, pavarësisht që jemi goxha skeptike tu u bazu që Gjykata në të kaluarën kanë treguar që japin vendime shumë të ulëta për kryesit e veprave, sidomos kur vjen puna te dhuna gjinore”, deklaroi ajo.
“Dënim maksimal për Krivaqën dhe Sejdiun”, “Vrasjet e grave janë vrasje të paralajmëruara”, “Motivi i vrasjes: Patriarkaliteti”, thuhet në disa nga pankartat e protestuesve.
Krivaqën., Prokuroria e ngarkon me veprën penale “Vrasje e rëndë dhe dhunim”, kurse Sejdiu po akuzohet për veprën penale “Vrasje e rëndë dhe ndihmë në kryerjen e dhunimit”.
Vrasja e Marigona Osmanit, ishte cilësuar si një nga vrasjet më të rënda të ndodhura në Kosovën e pasluftës. /Teve1.info/
