Në emisionin “Këndi i debatit” në Tëvë1 me Dukagjin Maliqi, Demhasaj tha se Kosova duhet të shfrytëzojë situatën e krijuar në Ukrainë qoftë për anëtarësimin në Këshillin e Evropës apo qoftë tendenca për anëtarësim në NATO.
“Situata që po zhvillohet në Ukrainë, në një farë mënyre edhe lëkundja e rendit botëror që ka mbizotëruar deri më tani, duhet Kosovën ta aktivizojë në të gjitha aspektet, qoftë në anëtarësimin në Këshillin e Evropës, qoftë tendenca për anëtarësim në NATO, ose edhe një përshpejtim i rrugës së Kosovës drejt Bashkimit Evropian”.
Sipas tij, për të parë sa janë këto gjasa reale mbetet të shihet cila është përgjigja e NATO-s, Këshillit të Evropës dhe Bashkimit Evropian.
Ai theksoi momentin kur NATO kishte rezistencë të madhe që të mos ndodhë votimi i ligjit që FSK-ja të shndërrohet gradualisht në ushtri.
“Nuk mund të harrojmë momentin kur është marrë iniciativa në Kosovë për votimin e ligjeve për ushtritë që FSK-ja të shndërrohet në mënyrë graduale në ushtri, NATO ka pasur rezistencë të madhe që kjo mos të ndodhë, por falë mbështetjes së Shteteve të Bashkuara të Amerikës kjo është arritur”, tha Demhasaj.
Analisti gjithashtu tha se nëse nuk ndodhë anëtarësimi i plotë në NATO, mund të nënshkruhet marrëveshje strategjike të bashkëpunimit më NATO-n, që në një mënyrë na vendos neve si shtet nën kujdesin e tyre.
