Ndërkohë, analisti Arton Demhasaj tha se është e kuptueshme që procesi gjyqësor ndaj Pantiqit nuk ka mundur të fillojë kaq shpejt, por sipas tij, masa e paraburgimi është dashur të vazhdohet edhe më tutje pasi Pantiq tani mund të ik nga drejtësia.
“Qe dy tri javë ka ndodhë arrestimi i tij dhe asnjë proces gjyqësor nuk mund të fillojë aq shpejt, jo në raste të tilla për terrorizëm… Duhet me e pa vendimin dhe arsyet e që ka dhënë gjyqtari sepse mendoj që ka pas arsye të mjaftueshme që ish-polici Dejan Pantiq me qëndrua ende në paraburgim sepse ekziston rreziku i ikjes, ekziston rreziku i frikësimit të dëshmitarëve, i zhdukjes së provave e të tjera”, është shprehur Demhasaj në emisionin “Këndi i Debatit” në Tëvë1.
Por sipas Demhasajt i pa pranueshme është edhe reagimi i kryeministrit ndaj vendimit të Gjykatës.
“Mirëpo në një shtet demokratik nuk mundet kryeministri në një konferecnë për shtyp dhe me thanë kush është ai prokuror, kush është ai gjyqtar që e ka bërë kërkesën dhe që e ka marrë vendimin. Kjo është absurde”, shtoi ai.
Pantiq është arrestuar më 10 dhjetor si i dyshuar për terrorizëm. Ai është i dyshuar për veprën penale “Sulm kundër rendit kushtetues” dhe për “kryerjen e veprës terroriste”. /teve1.info/
