Sipas Demhasaj, Kosova ndonjëherë ka qenë e detyruar të heqë dorë nga disa vendime, për shkak se i është vënë kusht liberalizimi i vizave.
“Çështja e vizave është karrem në dialog. Në momentin kur Kosova ngul këmbë në diçka, ofrohet liberalizimi i vizave si karrem për të lëshuar pe. Nëse kusht ka qenë demarkacioni, ne e kemi bërë demarkacionin por përsëri nuk janë hequr vizat. Është në pyetje dinjiteti shtetëror. Kosovës i kanë vendosur kriteret më të ashpra ndaj secilit vend që ka aplikuar për heqje të vizave. Përkundër që 4 vite i kemi plotësuar ato kushte, gjithashtu Komisioni Evropian përmes raportit ka thënë se Kosova i ka plotësuar të gjitha kriteret në përpikëri, neve përsëri nuk na dhanë të drejtën e udhëtimit”, tha Demhasaj në emisionin “Këndi i Debatit”,
E për këtë, ambasadori i Gjermanisë në Kosovë, Jorn Rohde ka deklaruar se duhet të gjendet një zgjidhje e shpejtë për çështjen e liberalizimit të vizave, duke shtuar se Gjermania e ka mbështetur Kosovën në tri fusha strategjike.
Ndërsa, më 12 tetor të këtij viti, Komisioni Evropian ka konfirmuar në Raportin vjetor të Progresit se mbështet rekomandimin e bërë për heqjen e vizave për Kosovën dhe konstatimin se shteti i ka përmbushur të gjitha kriteret.
Kujtojmë se Kosova mbetet vendi i vetëm në Ballkanin Perëndimor që ka ende regjimin e vizave./Tëvë1.info/
