Gjatë ditës së djeshme, stuhia e shoqëruar me breshër, ka shkaktuar dëme të konsiderueshme në një pjesë të Komunës së Malishevës.
Në njoftimin e komunës, është bërë e ditur se si pasojë e stuhisë janë dëmtuar në masë të madhe kulturat bujqësore, serrat dhe të mirat tjera materiale.
Drejtori i Drejtorisë për Bujqësi, Sylë Dukolli, ka shprehur keqardhje për dëmet që u janë shkaktuar bujqve.
“Do të jemi gjithmonë pranë qytetarëve, e në veçanti pranë bujqve e fermerëve, të cilët janë dëmtuar rëndë gjatë ditës së djeshme”, ka thënë Dukolli.
“Drejtori Dukolli, bashkë me zyrtarët përgjegjës të drejtorisë për bujqësi, i kanë vizituar disa nga fermerët e dëmtuar. Familjen e Shkumbin Malokut, të cilit breshëri e stuhia, i ka dëmtuar rreth 80 ari serrë dhe Hashim Malokun, të cilit gjithashtu stuhia, ka dëmtuar në tërësi serrën”, thuhet në njoftim.
Tutje, është njoftuar se përveç dëmeve të rënda në serrat e tyre, në tokë shihej breshëri i rënë gjatë ditës së djeshme, e që ende nuk është shkrirë dhe krahas serrave dhe pemëve, breshëri e stuhia i ka dëmtuar në masë të madhe edhe kulturat tjera, si grurin e pa korrur dhe misrin.
“Drejtori i drejtorisë për Bujqësi, Sylë Dukolli, ka bërë të ditur, se menjëherë është aktivizuar komisioni i cili do bëjë vlerësimin e dëmeve, varësisht nga kërkesat dhe ankesat e qytetarëve, të cilët e kanë njoftuar komunën, për dëmet në të mbjellat e tyre”, thuhet mes tjerash në njoftimin e Komunës së Malishevës./teve1.info/
