Fadil Demaku, kandidat i PDK-së për deputet i cili sipas rezultateve preliminare ka fituar ulëse në legjislativin e ri, ka thënë se partitë opozitare duhet të fokusohen për të formuar qeverinë.
Ai ka thënë se forcat politike opozitare duhet ta qojnë në vend besimin e qytetarëve të cilët kanë kundërshtuar qeverisjen e kaluar.
“Kisha dashtë me besu që paritë opozitare, besimin e qytetarëve e kanë marrë duke qenë në kundërshtim të plotë dhe kritikuar veprimet e qeverisë së 4 viteve. Do duhej të fokusoheshin për të krijuar një qeveri që do të përfaqësonte në radhë të parë këtë elektorat dhe gjithë qytetarëve të Kosovës. Opozita ka numra më shumë, mundësi më të mëdha për ta bërë qeverinë kanë forcat opozitare. Do ta preferoja një qeveri të opozitës dhe besoj se është në interes të qytetarëve të vendit”, ka thënë Demaku në emisionin “InfoNata” në Tëvë1.
Ai ka thënë se personalisht është kundër një koalicioni të PDK –së me Vetëvendosjen
“Nuk duhet të bëjmë një qeveri me Vetëvendosjen, sepse PDK ka marrë vota duke qenë tërësiht të pakënaqur nga qeverisja e Vetëvendosjes”, ka thënë ai.
