Deputetja Deliu-Kodra përmes një postimi në Facebook ka shkruar se Ministrja e Drejtësisë e përdor e keqpërdor çdo rast të drejtësisë për ta krijuar idenë e mbrojtëse të drejtësisë, shkruan teve1.info.
“Ministrja e Drejtësisë, nuk ka rast të mundshëm që nuk e përdor e keqpërdor për të krijuar idenë e një mbrojtëse të drejtësisë; duke na treguar përkushtim për rend e ligj, për luftë kundër korrupsionit, për transparencë e llogaridhënie. Tash e disa ditë heshtje nga ajo për skandalin e pushtetit në emër të së cilit qeverisë. Duke heshtur për megaskandalin që përfshin ambasadorin tonë në Kroaci, i cili mes tjerash, ka bërë vepër penale duke fshehur pasurinë e deklaruar në Agjencinë Kundër Korrupsion, Ministrja po i jep zë krimit”, ka shkruar ajo.
Më tej Deputetja e PDK-së ka shtuar se ministrja Haxhiu duhet të mbajë qëndrim politik edhe nëse ambasadori Berishaj duhet të shkarkohet apo të vazhdojë punën.
“Prandaj, ministrja e Drejtësisë duhet të mbajë qëndrim publik lidhur me rastin; për hetimin e pasurisë së tij, për dyshimin e përfshirjes në shpëlarje parash e përfitim nga “mafia serbe e energjetikës.Duhet të mbajë qëndrim politik edhe nëse Ambasadori Berishaj duhet të shkarkohet apo vazhdojë punën sikur asgjë s’ka ndodhur?!” ka thënë Deliu-Kodra.
Ndërsa në fund ajo është shprehur se “ për t’ju dhënë përgjigje shumë pyetje, komisioni hetimor do të themelohet, me ose pa vullnetin e mazhorancës”.
Ambasadori i Kosovës në Kroaci, Martin Berishaj sipas medieve sllovene dyshohet për shpëlarje parash ku ka bartur rreth 600 mijë euro nga kompania e tij në Mal të Zi tek një politikan opozitar slloven.
