Deputetja e PDK-së, Blerta Deliu ka deklaruar se për herë të parë në jetën politike është fyer, sharë, shtyrë dhe do të ishte goditur nga deputeti i Vetëvendosje Halil Thaçi gjatë përplasjes që ka ndodhur në Kuvend, po të mos mbrohej nga deputetët e partisë së saj.
Ai tha se është e turpshme se deri ku është në gjendje të shkoj kjo Qeveri për të fshehur ‘skandalin e madh politik në të cilën është përfshirë në lidhje me koordinimin me Listën Serbe”.
“Sot, për herë të parë në jetën time politike, jam fyer, sharë, shtyrë dhe, do të isha edhe e goditur nga deputeti i Vetëvendosjes Halil Thaçi, sikur të mos kisha mbrojtjen e kolegëve deputetë të PDK-së. Asnjëherë nuk jam ndier kaq e rrezikuar dhe e goditur si deputete, si grua e si nënë, në të gjitha vitet e mija në shërbim të këtij vendi.
Është e turpshme se deri ku është në gjendje të shkoj kjo Qeveri, kjo shumicë parlamentare, për të fshehur skandalin e madh politik në të cilën është përfshirë në lidhje me koordinimin me Listën Serbe. Edhe këto goditje të ulëta, kjo fushatë e orekstruar ndaj opozitës, nuk do të na ndalë në demaskimin e fytyrës së vërtetë të kësaj Qeverie. Beteja për Kosovën dhe rrugën e saj euro-atlantike, larg bashkëpunimit me Serbinë, vazhdon pandalshëm”, ka shkruar ajo.
