Deputetja e PDK-së, Blerta Deliu-Kodra, ka kërkuar në Kuvendin e Kosovës që institucionet vendore të mbështesin krijimin e një mekanizmi profesional dhe të pavarur për monitorimin e procedurave pranë Dhomave të Specializuara të Kosovës dhe Zyrës së Prokurorit të Specializuar. Ajo ka kërkuar që shqetësimet e ngritura në raportin e Avokatit të Popullit të trajtohen me seriozitet dhe t’u adresohen edhe partnerëve ndërkombëtarë.
Deliu-Kodra, duke folur në seancën e Kuvendit, ka theksuar se shqetësimet e paraqitura në raportin e Avokatit të Popullit lidhur me të drejtat e ish-drejtuesve të Ushtrisë Çlirimtare të Kosovës kërkojnë vëmendje dhe angazhim institucional.
Sipas saj, institucionet e Kosovës duhet të shqyrtojnë çështjet e ngritura dhe të kërkojnë veprim nga organet përgjegjëse, duke respektuar njëkohësisht kornizën ligjore dhe pavarësinë e gjyqësorit.
“Kur institucioni kushtetues për mbrojtjen e të drejtave të njeriut ngre shqetësime të kësaj peshe, Kuvendi ka detyrim t’i shqyrtojë ato dhe të kërkojë veprim nga institucionet përgjegjëse”, ka deklaruar Deliu-Kodra.
Ajo ka thënë se raporti ngre çështje që lidhen me transparencën, llogaridhënien, barazinë e palëve dhe garancitë për një gjykim të drejtë e të paanshëm. Deputetja e PDK-së ka veçuar gjithashtu vlerësimin e përmendur në raport lidhur me atë që ajo e cilësoi si devijim të mandatit të Dhomave të Specializuara nga qëllimi fillestar.
Një tjetër çështje që ngriti Deliu-Kodra ishte mungesa e mbikëqyrjes demokratike mbi funksionimin e Dhomave të Specializuara. Sipas saj, institucionet e Kosovës nuk kanë pasur mundësi reale për të ushtruar mbikëqyrje dhe për të kërkuar llogaridhënie lidhur me punën e tyre.
Ajo ka përmendur edhe shqetësimet për respektimin e jetës private dhe familjare gjatë vizitave në paraburgim, kohën në dispozicion të mbrojtjes dhe garantimin e barazisë së palëve në proceset gjyqësore.
Deliu-Kodra ka kërkuar gjithashtu qartësi lidhur me qasjen e mbrojtjes në informacionet për origjinën dhe besueshmërinë e materialeve të përdorura në procedura, veçanërisht të atyre që, sipas saj, kanë ardhur nga Serbia.
Ajo ka theksuar se këto çështje duhet të trajtohen përmes argumenteve profesionale dhe mekanizmave institucionalë, duke respektuar standardet e të drejtave të njeriut dhe garancitë për një proces të drejtë.
Në fjalën e saj në Kuvend, deputetja ka ritheksuar qëndrimin e Partisë Demokratike të Kosovës për angazhimin në çështjen e ish-krerëve të UÇK-së që po përballen me proces gjyqësor në Hagë.
“Për PDK-në, drejtësia për krerët e UÇK-së mbetet një përgjegjësi e përhershme. Kjo përgjegjësi kërkon punë të organizuar, argumente profesionale dhe angazhim shtetëror të vazhdueshëm”, ka deklaruar ajo.
Deliu-Kodra ka përmendur me emër Hashim Thaçin, Kadri Veselin, Jakup Krasniqin dhe Rexhep Selimin, duke theksuar se ata kanë të drejtë që gjatë procedurave gjyqësore t’u garantohen të gjitha të drejtat procedurale. Ajo ka shtuar se edhe familjet e tyre kanë të drejtë të presin angazhim serioz nga institucionet e Kosovës.
Në emër të PDK-së, deputetja ka kërkuar që shqetësimet e dokumentuara t’u përcillen zyrtarisht Këshillit të Evropës, Bashkimit Evropian dhe partnerëve të tjerë ndërkombëtarë, me kërkesë për një vlerësim të pavarur dhe respektimin e standardeve të të drejtave të njeriut.
Në përfundim të fjalës së saj, Deliu-Kodra ka vënë theksin te rëndësia e llogaridhënies si një prej parimeve themelore të demokracisë, duke kërkuar që edhe funksionimi i Dhomave të Specializuara të trajtohet në përputhje me parimet demokratike dhe kushtetuese të Republikës së Kosovës.
“Parimi i parë dhe themelor i ndërtimit të demokracisë në një vend është llogaridhënia”, ka përfunduar Deliu-Kodra.
