Deputetja e Partisë Demokratike të Kosovës, Blerta Deliu Kodra, deklaroi se kontratat një-burimore janë bërë standard i përditshëm i Qeverisë Kurti.
Gjatë seancës së jashtëzakonshme për të shqyrtuar themelimin e Komisionit Hetimor për kontratat njëburimore, Deliu-Kodra tha se në hulumtimin e bërë nga PDK-ja në gjashtë ministri, thuhet se këto kontrata janë përdorur në kundërshtim me ligjin.
“Kontratat një-burimore janë bërë standard i rregullt, standard i përditshëm i kësaj qeverie dhe ministrave të saj. Është bërë rregull dhënia e kontratave dhe negocimi i tyre në tavolina kafenesh me miq e me dosta pa asnjë procedurë, pa konkurrencë, pa asnjë transparencë. Raporti për vendin e thotë se gjatë vitit 2022, 21.8 për qind e kontratave apo 78,5 milionë euro janë nënshkruar me negocim të drejtpërdrejt, pa publikim e pa njoftim e pa kontratë. Sipas Komisionit Rregullativ të Prokurimit Publik gjatë këtij mandati qeverisës janë nënshkruar gjithsejtë mbi 1800 kontrata një-burimore, të cilat kapin vlerën mbi 240 milionë euro. Dhe për të saktësuar e konfirmuar këtë që po e them do ta ilustrojmë edhe me fakte”, deklaroi ajo para deputetëve.
Më tej, Deliu-Kodra, potencoi se qytetarët kanë të drejtë ta dinë se ku po shkon buxheti i vendit.
Teksa ka parashtruar disa pyetje në emër të PDK-së, Deliu-Kodra, tha se komisioni hetimor parlamentar duhet të ketë përgjigje për secilën nga to.
“Janë disa pyetje të cilat unë sot do i shtrojë në emër të PDK-së. Cilat ministri dhe ndërmarrje publike kanë aplikuar kontrata një-burimore? Cila është vlera e secilës kontratë dhe e gjitha së bashku? A janë zbatuar gjetjet, a janë zbatuar rekomandimet të Zyrës Kombëtare të Auditimit lidhur me këto kontrata një-burimore? A janë përmbushur kushtet dhe kriteret e përcaktuara me legjislacion në fuqi? Këto dhe shumë pyetje të tjera pa asnjë paragjykim, komisioni hetimor parlamentar do t’i shtrojë para vetës dhe natyrisht do të duhej që të ju jepet përgjigje shqetësimeve të cilat sapo i thash. Qytetarët kanë plotësisht të drejtë të dinë se ku shkojnë taksat e tyre, kanë plotësisht të drejtë që të informohen se ku shkojnë paratë e tyre.”, përfundoi ajo./teve1.info/.
