Deputetja e Partisë Demokratike të Kosovës, Blerta Deliu ka reaguar pasi Gjykata Themelore në Ferizaj edhe në rigjykim ka dënuar Dardan Krivaqën me burgim të përjetshëm për vrasjen e Marigona Osmanit.
Deliu përmes një postimi në Facebook, ka thënë se burgimi i përjetshëm duhet të jetë dënim i vetëm për ata njerëz që vrasin vajzat dhe gratë në Kosovë, shkruan teve1.info
Tutje Deliu, theksoi se ky duhet të jetë një mesazh i fuqishëm për të gjithë ata që guxojnë të ngrehin duartë mbi vajzat e gratë.
“Burgimi i përjetshëm duhet të jetë dënimi i vetëm për ata që vrasin vajzat dhe gratë në Kosovë. Gjykata Themelore e Ferizajt ka rikonfirmuar sot dënimin e përjetshëm për vrasësin e Marigona Osmanit. Le të jetë ky një mesazh i fuqishëm për të gjithë ata që guxojnë të ngrehin duartë mbi to. Marigonë, kujtimi yt do të frymëzojë luftën e vajzave dhe grave kosovare për drejtësi”, ka shkruar Deliu.
Ndryshe, sot Gjykata Themelore në Ferizaj edhe në rigjykim ka dënuar Dardan Krivaqën me burgim të përjetshëm për vrasjen e 18-vjeçares, Marigona Osmani.
Ndërsa, Arbër Sejdiu, i akuzuar për veprën penale ‘Ndihmë në kryerjen e veprës penale vrasje e rëndë’, është dënuar me 15 vite burgim, në të cilin dënim i llogaritet edhe koha e kaluar në paraburgim nga data 22 gusht 2021.