Procesi i përzgjedhjes së tij u kontestua nga vendorë e ndërkombëtarë, madje dy nga kandidatët ushtruan edhe ankesë në Gjykatë Kushtetuese.
Ndonëse Kushtetuesja i ktheu përgjigjje negative Shqipdon Fazliut e Armend Hamitit, nga Presidenca kanë bërë të ditur për Tëvë 1 se nuk do të ketë dekretim pa përfunduar trajtimi i çështjes nëpër gjykata.
“Presidentja është njoftuar zyrtarisht se çështja është duke u trajtuar në gjykata të rregullta. Për t’i respektuar instancat gjyqësore, derisa të përfundojnë këto procedura, presidentja nuk do të veprojë. Pas përfundimit të procedurave gjyqësore, presidentja në përputhje me përgjegjësitë kushtetuese do t’i ndërmarrë veprimet e duhura”, tha Bekim Kupina, këshilltar për media i Presidentes.
E prokurori Shqipdon Fazliu po e vazhdon betejën nëpër gjykata për anulimin e vendimit të Këshillit Prokurorial, për propozimin e Isufajt.
Fillimisht Fazliu përmes avokatit të tij iu drejtua Gjykatës Themelore në Prishtinë, por ajo e hodhi poshtë kërkesën, duke e cilësuar të pasafatshme.
Tani ai po kërkon nga Apeli që lëndën ta vendos në rigjykim.
“Ankesa është bërë për shkak të shkeljes së dispozitave të procedurës administrative, për shkak të konstatimit të gabuar apo jo të plotë të gjendjes faktike dhe për shkak të zbatimit të gabuar të së drejtës materiale. Përmes ankesës kemi kërkuar që ankesa të APROVOHET në tërësi si e bazuar, të ANULOHET Aktvendimi i Gjykatës Themelore në Prishtinë, Departamenti për Çështje Administrative, i datës 02.08.2022 dhe t’i kthehet Gjykatës Themelore në Prishtinë, Departamentit për Çështje Administrative në rigjykim dhe rivendosje kjo çështje juridike”, tha avokati i Fazliut, Flakron Sylejmani.
Kurse, prokurori Armend Hamiti i ka thënë shkurt mediumit se ende nuk e ka pranuar vendimin e plotë të Gjykatës Kushtetuese dhe pasi ta pranojë do të vendosë për hapat e mëtejmë.
Gëzim Shala, hulumtues në Insitutin e Kosovës për Drejtësi vlerëson se vendimi i presidentes për dekretim nuk duhet të varet nga vendimet gjyqësore.
“Presidentja nuk është e lidhur apo e varur me asnjë vendim gjyqësor, qoftë edhe nga Gjykata Kushtetuese e aq më pak nga gjykatat e rregullta. Sikur gjykatat të vlerësonin se ky proces nuk duhet të vazhdojë më tutje kanë mundur të vendosin masë të përkohshme dhe procesi të mos vazhdojë më tutje”, tha ai.
Shala vlerëson se presidentja do të duhej të vendoste brenda një afati të arsyeshëm kohor e jo ta zgjasë kaq shumë dekretimin e kryeprokurorit.
Detyrën e Kryeprokurorit të Shtetit që nga 21 prilli e ushtron prokurori Besim Kelmendi.
Kronika e realizuar nga Gojart Jashari.