Kryetari i Drenasit, Ramiz Lladrovci, ka demantuar lajmin se vetura e aktivistit Perparim Haradini është dëmtuar nga “njerëzit e tij”.
Lladrovci thotë se vetura e cila është publikuar në rrjete sociale e dëmtuar më datë 19 (e enjte) e njëjta është konfiskuar më datë 4 shtator nga Policia e Kosovës.
“Videoja ku shihet vetura e dëmtuar është deklarim i rremë dhe mashtrim ndaj opinionit publik nga ana e personave të identifikuar nga Policia.Paraqitje e rreme e dëmtimit të veturës kishte për qëllim denigrimin e procesit demokratik që zhvillohet tradicionalisht në Komunën dhe Kuvendin e Drenasit, dhe ishte drejtuar kundër meje si kryetar i Komunës”, ka shkruar ai në Facebook.
Pak para se të niste seanca në Kuvendin Komunal të Drenasit disa aktivistë të “Demokratët për Drenasin” kishin kundërshtuar dhënien e 54 pronave publike. Lidhur me këtë kryetari Lladrovci të njëjtit i kishte larguar nga salla.
Ndërkohë, pas seancës, aktivisti Përparim Haradini kishte reaguar në rrjete sociale duke thënë se dikush ia ka dëmtuar veturën pas kundërshtimeve për prona.
