Ministri izraeli i Financave, Bezalel Smotrich, tha të enjten se nuk do të pranonte një marrëveshje normalizimi me Arabinë Saudite nëse kjo do të nënkuptonte krijimin e një shteti palestinez, duke thënë me përçmim se sauditët mund të “vazhdojnë të hipin mbi deve”.
“Nëse Arabia Saudite na thotë ‘normalizim në këmbim të një shteti palestinez’, miq — jo, faleminderit. Vazhdoni të hipni mbi deve në shkretëtirën e Arabisë Saudite dhe ne do të vazhdojmë të zhvillohemi me ekonominë, shoqërinë dhe shtetin dhe gjërat e mëdha që dimë të bëjmë”, tha Smotrich, duke folur në një konferencë të quajtur “Halacha në Epokën Teknologjike” të organizuar nga Instituti Zomet dhe gazeta Makor Rishon.
Smotrich u denoncua nga disa udhëheqës të opozitës, të cilët e akuzuan atë për injorancë dhe shkaktim dëmi, thanë se ai nuk përfaqësonte Izraelin dhe kërkuan që të kërkonte falje, shkruan The Times of Israel.
Kreu i partisë së ekstremit të djathtë, Sionizmi Fetar, kërkoi falje disa orë më vonë, me një paralajmërim: “Komenti im për Arabinë Saudite ishte absolutisht i papërshtatshëm dhe kërkoj ndjesë për fyerjen që shkaktoi”, tha ai.
