Kryetari i Partisë Demokratike të Kosovës, Memli Krasniqi, për përvjetorin e 33-të të Deklaratës Kushtetuese për Kosovën thotë se është një prej akteve politike-juridike më të rëndësishme në historinë e vendit.
Krasniqi ka nderuar të gjithë delegatët e popullit, i cili tha se me këtë deklaratë e kanë shpallur Kosovën njësi të pavarur dhe të barabartë me të gjitha Republikat tjera të ish-Jugosllavisë.
“Sot nderojmë të gjithë delegatët e guximshëm të popullit të Kosovës, të cilët me këtë deklaratë e shpallën Kosovën njësi të pavarur dhe të barabartë me të gjitha Republikat tjera të ish-Jugosllavisë, ndonëse ndërtesa e Kuvendit ku ata ishin mbledhur, ishte e rrethuar nga policia serbe”, ka shkruar Krasniqi.
Tutje, ai thotë se Deklarata e Kushtetuese e 2 korrikut ishte shprehje e aspiratave të popullit për liri, demokraci e pavarësi.
“Deklarata Kushtetuese e 2 korrikut ishte shprehje e aspiratave të popullit tonë për liri, demokraci dhe pavarësi, e cila i parapriu Kushtetutës së Kaçanikut, si dhe proceseve tjera në një rrugë të gjatë e plot sakrifica, që kulmoi me shpalljen e Kosovës shtet të pavarur dhe sovran”, ka shkruar tutje ai në Facebook./teve1.info/
