Ish-nënkryetari i Gjykatës Kushtetuese të Kosovës, Kadri Kryeziu, ka reaguar ashpër ndaj deklaratës së ministres së Administratës Publike dhe Vetëqeverisjes Lokale të Serbisë, Snezana Paunović, e cila deklaroi se, po të ishte në vend të Sllobodan Millosheviqit, do ta kishte kryer spastrimin etnik të shqiptarëve në Kosovë.
I ftuar në emisionin “Këndi i Debatit” në Tëvë1, Kryeziu tha se deklarata është veçanërisht shqetësuese pasi vjen nga një përfaqësuese e qeverisë serbe dhe jo nga një individ.
“Kur flet një individ në Serbi, është diçka tjetër. Por kur flet një përfaqësuese e një qeverie aktive në këtë shekull, në kohën kur Serbia pretendon të bëhet pjesë e Bashkimit Evropian dhe të paraqitet si shtet evropian, atëherë Franca, Gjermania dhe e gjithë Evropa duhet ta dinë shumë mirë se me çfarë qeverie kanë të bëjnë. Sipas meje, është një qeveri fashiste”, deklaroi Kryeziu.
Ai kujtoi krimet e kryera gjatë luftës në Kosovë, duke theksuar se qytetarët nuk duhet të habiten nga deklarata të tilla, por të punojnë për forcimin e shtetit dhe institucioneve.
“Kjo është një qeveri që para 26 vjetësh vrau 1.430 fëmijë. Prandaj nuk duhet të habitemi. Duhet të forcojmë Policinë, Ushtrinë, inteligjencën dhe institucionet e Kosovës. Nuk kemi rrugë tjetër për të garantuar sigurinë dhe të ardhmen e vendit”, u shpreh ai.
Kryeziu tha gjithashtu se lufta e viteve 1998–1999 ishte e pashmangshme, duke shtuar se shqiptarët nuk e zgjodhën luftën, por u detyruan ta përballonin atë.
“Lufta e viteve 1998–1999 ishte e imponuar. Ne nuk e dëshiruam luftën dhe nuk kishim kapacitete të mëdha ushtarake, por kishim vullnetin për të mbrojtur vendin tonë”, tha ai.
Në fund, Kryeziu u shpreh se Serbia duhet ta kuptojë se shqiptarët nuk mund të dëbohen më nga trojet e tyre.
“Serbia duhet ta harrojë idenë se mund ta zhdukë apo ta dëbojë popullin shqiptar. Ne jemi një komb me Shqipërinë dhe duhet të forcojmë edhe më shumë institucionet tona. Jemi rreth shtatë milionë shqiptarë dhe këtë duhet ta kenë parasysh. Le të thonë çfarë të duan, por realiteti është ndryshe”, përfundoi Kryeziu./teve1.info/
