Mungon vetëm zyrtarizimi, por tashmë është e sigurt që Luis de la Fuente do ta vazhdojë sot kontratën me Federatën Spanjolle të Futbollit (RFEF).
Presidenti i kësaj Federate, Rafael Louzan do të takohet me selektorin në zyrat e shtëpisë së futbollit spanjoll për ta finalizuar marrëveshjen.
Sapo të nënshkruhet kontrata e re, do të bëhet publike, shkruan.
Me këtë rast, de la Fuente do ta udhëheqë “Stuhinë e Kuqe” në Botërorin 2026, i cili do të mbahet në Shtetet e Bashkuara të Amerikës, në Kanada e në Meksikë, si dhe në Evropianin e vitit 2028.
“Nuk është normale që një kampion i Evropës është pa kontratë. Nuk e di nëse Luis Enriques do t’i ndodhte diçka e tillë. Kam pasur oferta, siç është normale që do të ndodhte. Ajo që nuk është normale është që një selektor kampion Evrope është pa kontratë, nuk e di nëse ka ndodhur diçka e tillë në histori. I kam kushtet e njëjta të kontratës siç i kisha kur kam ardhur nga U-21. Do të ishte e udhës nëse do ta nënshkruaja tash kontratën e re”.
Kështu thoshte Luis de la Fuente në muajin tetor gjatë grumbullimit të Kombëtares spanjolle.
Një “bombë” që ishte lëshuar pikërisht në zemër të Federatës Spanjolle.
Ai kishte deklaruar se nuk është në rregull që një trajner kampion i kontinentit të paguhet njëjtë me selektorin e U-21.
Tash kontrata e tij është gati: nëse do t’i arrijë një seri objektivash jo fort të komplikuara, do t’i kalojë 2 milionë euro në vit.
Është marrë për bazë edhe opinioni i lojtarëve të Kombëtares, të cilët e kanë treguar rëndësinë që e ka për ta Luis de La Fuente, një njeri mjaft i rëndësishëm i një projekti afatgjatë, me një bazë të të rinjve me synim dhe potencial për ta fituar Botërorin e ardhshëm.
