Për akuzat për krime lufte mbi popullatën civile në komunën e Istogut, që e ngarkon Prokuroria, i akuzuari Ekrem Bajroviq nuk tha asgjë në Gjykatën Themelore të Prishtinës.
Madje ai vendosi të mbrohet në heshtje kur u pyet nga trupi gjykues për të dhënë mbrojtjen e tij.
“Nuk kam se çka të shtoj më tepër, përveç deklaratës që kam dhënë në Prokurori. Dua të mbrohem në heshtje, në këtë fazë të procedurës”, tha i akuzuari.
Teksa është bërë edhe administrimi i provave, edhe i dëmtuari në këtë rast Daut Elshani pati diçka për të dhënë e thënë.
Fotografitë e djemtë të tij të vrarë në masakrën e Saradranit, ia dorëzoi kopje si dëshmi gjykatës.
“Nexhmedin Elshani 18 vjec, qiky është MuadinElshani, djali jem i madh 22 vjeç, ky është djali i dytë Shemsedin Elshani ku u kon ka 20shi qaty, kjo është 8 kufoma të familjes që i kom, 5 i kom të mitë”, u shpreh Elshani.
Në këtë fazë të procedurës kur prokurori Ilir Morina propozoi që të mos lexohet dëshmia e dëshmitari 19, mbrojtja e të akuzuarit pati disa kundërshtime.
“19 është dëshmitari RamizZeqiraj i cili nuk ka mundur ta bëj identifikimin e të akuzuarit dhe ky ka qenë një gabim teknik gjatë përpilimit të aktakuzës, tha Ilir Morina, prokuror special.
Vërejtje pati nga avokati i të akuzuarit Lubomir Pantoviq.
“Kundërshtimet i keni si në vijim ky veprim shumë i rëndësishëm procedural është kryer pa prezencën e mbrojtës dhe të gjitha veprimet hetimore në identifikim janë kryer ne vitin 2023. Në konsiderojmë që nuk ka pasur asnjë arsye që mbrojtja e të pandehurit të mos njoftohet për takimet e këtyre veprimeve hetimore”,tha ai.
Sipas aktakuzës PSRK-së, të ngritur më 15 shtator 2023, Ekrem Bajroviq akuzohet gjatë viteve 1998-1999 se ka kryer krime lufte kundër popullsisë civile, në Komunën e Istogut dhe fshatrat përreth.
