Ambasada e Kosovës në Washington ka marrë vlerësim nga Departamenti Amerikan i Shtetit (DASH) për aktivitetet e zhvilluara në kuadër të shënimit të 250-vjetorit të pavarësisë së Shteteve të Bashkuara të Amerikës.
Lajmi është bërë i ditur nga vetë Ambasada e Kosovës në Washington, e cila ka shprehur kënaqësinë për vlerësimin e marrë nga autoritetet amerikane.
Në njoftimin e saj, Ambasada thekson se aktivitetet janë zhvilluar në nderim të këtij përvjetori historik dhe se Kosova është e nderuar ta shënojë këtë moment së bashku me miqtë e saj amerikanë.
“Kemi kënaqësinë dhe e çmojmë vlerësimin nga Departamenti Amerikan i Shtetit për disa nga aktivitetet e Ambasadës sonë për nder të 250-vjetorit të pavarësisë së Shteteve të Bashkuara te Amerikës. Jemi të nderuar ta shënojmë këtë moment historik së bashku me miqtë tanë amerikanë, dhe të kremtojmë miqësinë e qëndrueshme dhe vlerat e përbashkëta që i lidhin kaq ngushtë Kosovën dhe Shtetet e Bashkuara”, ka njoftuar Ambasada e Kosovës në Washington.
