Departamenti Amerikan i Shtetit ka dënuar veprimet e Qeverisë së Kosovës, për të hyrë me forcë në ndërtesat komunale në veri të Kosovës.
Përmes një komunikate për media, thuhet se këto veprime janë ndërmarrë kundër këshillave të Shteteve të Bashkuara dhe partnerëve evropianë të Kosovës.
“Shtetet e Bashkuara të Amerikës dënojnë ashpër veprimet e Qeverisë së Kosovës për të hyrë me forcë në ndërtesat komunale në veri të Kosovës, veprime që ajo ndërmori kundër këshillave të Shteteve të Bashkuara dhe partnerëve evropianë të Kosovës”, thuhet në komunikatë.
Gjithashtu, nga Departamenti Amerikan i Shtetit është thënë se do të ketë pasoja për marrëdhëniet dypalëshe me Kosovën.
“Këto veprime kanë përshkallëzuar në mënyrë të mprehtë dhe të panevojshme tensionet, duke minuar përpjekjet tona për të ndihmuar në normalizimin e marrëdhënieve ndërmjet Kosovës dhe Serbisë dhe do të kenë pasoja për marrëdhëniet tona dypalëshe me Kosovën”.
Ndërkaq, i është bërë thirrje kryeministrit të Kosovës, Albin Kurti, që ta ndryshojë kursin dhe të gjitha palët të përmbahen nga çdo veprim i mëtejshëm që ndezë tensionet dhe nxitë konflikt.
“I bëjmë thirrje kryeministrit Albin Kurti që të ndryshojë kursin dhe të gjitha palët të përmbahen nga çdo veprim i mëtejshëm që do të ndezë tensionet dhe do të nxisë konfliktin”.
Pas përshkallëzimit të situatës në veri, ShBA ka akuzuar Qeverinë e Kosovës për masa të dhunshme në veri. Sekretari amerikan i Shtetit, Antony Blinken, ka thënë se këto aksione të Qeverisë së Kosovës po përshkallëzojnë situatën në veri. Ndërsa, presidentja e vendit, Vjosa Osmani, ka deklaruar se veprimet e Policisë së Kosovës ndaj strukturave ilegale në veri janë legjitime. /teve1.info/
