Danimarka ka nisur të enjten presidencën e saj gjashtëmujore të Bashkimit Evropian, duke theksuar nevojën urgjente për bashkim në përballjen me sfidat globale.
Në një ceremoni festive në qytetin perëndimor të Aarhus, ku ishin të pranishëm Kryeministrja Mette Frederiksen dhe Presidentja e Komisionit Evropian Ursula von der Leyen, Danimarka prezantoi prioritetet e saj, ndër të cilat dominon mbështetja për Ukrainën dhe sfidat ekonomike që vijnë nga tensionet tregtare ndërkombëtare.
Ministrja daneze e Çështjeve Evropiane, Marie Bjerre, shprehu shqetësimin për situatën e luftës që vazhdon në tokën evropiane dhe për rritjen e tarifave globale të tregtisë, të cilat po krijojnë kaos ekonomik.
Ajo theksoi gjithashtu ndryshimin në qëndrimin e Shteteve të Bashkuara, një nga aleatët më të ngushtë të Evropës, duke theksuar se Amerika po kthehet më shumë nga brenda, duke i shtuar kështu presion BE-së për të qenë më e pavarur, shkruan AP.
“Evropa nuk mund të jetë më në hijen e Shteteve të Bashkuara. Tani duhet të qëndrojmë në këmbët tona,” deklaroi Bjerre, duke nxjerrë në pah nevojën për një politikë më të unifikuar dhe më të fortë evropiane.
Kjo është presidenca e tetë e Danimarkës që nga anëtarësimi i saj në BE në vitin 1973, dhe ajo vjen në një periudhë kur Bashkimi Evropian përballet me sfida të shumta, duke përfshirë konfliktin në Ukrainë, ndryshimet në marrëdhëniet transatlantike dhe pasojat ekonomike të rritjes së tarifave tregtare globale.
Presidencat ndërrohen me rotacion midis 27 vendeve anëtare të BE-së çdo gjashtë muaj. Kombi përgjegjës përcakton prioritetet e politikave dhe organizon axhendën e punës së bllokut. Ai supozohet të veprojë si një “ndërmjetës i ndershëm”, duke lënë mënjanë interesat kombëtare për të nxitur konsensusin.
