I besoi në momentin me të vështirë të karrierës, dhe tani besimi i Tahir Batatinës kundrejt Mirlind Dakut po shpërblehet përherë të dytë.
Sulmuesi gjilanas, Mirlind Daku do të transferohet në Rusi te Rubin Kazan. Daku me skuadrën ruse do të firmos një kontratë trevjeçare. 25-vjeçari ishte në pronësinë e skuadrës kroate Osijek, dhe nga klubi kroat është shitur për 1.2 milion euro.
15% të kartonit i zotëron edhe Llapi, trajneri i kësaj skuadrë Tahir Batatina për Tëvë 1 tha se ndihet i lumtur për arritjen e Dakut, derisa thotë se ka sakrifikuar duke lënë në gjendje jo të mirë edhe klubin e tij.
“Jam shumë i lumtur shumë, sepse edhe një herë po binden se ju besoj talentave dhe Mirlindit i kom besu. Ai tash ka arritur të transferohet të një skuadër e madhe dhe kjo tregon se për të i hapur rrugën një talenti duhet me u sakrifiku. Unë kam sakrifikuar për Dakun, duke e lënë edhe skuadrën në gjendje jo të mirë, vetëm për të i hapur dritaren e zhvillimit dhe sot kjo tregon sa i favorizoj lojtarët dhe talentat”
Daku nga Llapi kishte kaluar te Osijeku për 60 mijë euro. 25 vjeçari me pas nga skuadra kroate ishte huazuar te Ballkani, ku për një edicion shënoi 30 gola dhe me pas u huazua sërish te skuadra sllovene NS Mura, dhe për 37 paraqitje ai realizoi 22 gola, duke qenë golashënuesi i dytë më i mirë në kampionatin slloven.
Për Dakun interes me pas shprehën edhe Rapidi i Bukureshtit dhe Trabzonspori i Turqisë, por oferta e hedhur në ankand nga Osjeku prej 1.1 milion euro, e realizoi vetëm skuadra ruse Rubin Kazan që e bleu për 1.2 milionë. Nga shitja e Dakut përfiton edhe Llapi. Llapi në këtë shitje do të fitoi 180 mijë euro.
Dakun e pret vendim i rëndësishëm edhe për përfaqësuese. Ai së fundi është pajisur me shtetësi të Shqipërisë. Daku ka vlerësuar se e meritonte ftesën nga Kosova për ndeshjet e qershorit. Por ajo megjithatë, nuk i erdhi. Daku llogaritet pjesë e listës së gjerë te Përfaqësuesja e Kosovës, ai ka të zhvilluar pesë ndeshje miqësore me Kosovën, ndërsa 13 ballafaqime i kishte me Kosovën U21. Ka realizuar tre gola dhe dy asistime.
Daku karrierën e ka nisur në Kosovë te Hajvalia, ndërsa ka luajtur edhe në Shqipëri për një kohë të shkurtër te Kukësi.
