Ditëve në vijim, pritet të mësohet e ardhmja e sulmuesit të Rubin Kazanit, Mirlind Daku.
Pas raportimeve se për 27-vjeçarin ka interesim nga ekipet tjera të Rusisë dhe pastaj Italisë, së fundmi në garë është futur edhe një ekip nga Franca.
Në një intervistë dhënë për mediumin “Championship”, Daku ka thënë se deri tani ka spekulime dhe asgjë konkrete.
Është thënë se Spartaku i Moskës ka shprehur interesim për t’i siguruar shërbimet e tij.
“Të gjithë e dinë se Spartaku është skuadër e madhe. Por, nuk ka asgjë konkrete. Askush nuk ka folur me mua apo me menaxherin tim. Nuk kam çfarë të them për këtë, përveç se Spartaku është njëra prej skuadrave më të mëdha në Rusi”, ka deklaruar Daku të mërkurën.
Daku ka luajtur me Shqipërinë në verën e vitit të kaluar në Kampionatin Evropian që u organizua në Gjermani.
Në sezonin aktual, Daku në 17 ndeshje të zhvilluara në elitën ruse, ka nëntë gola e pesë asistime.
Kontrata e tij me Rubin Kazanin skadon në qershor të vitit të ardhshëm, ndërsa ekipit rus iu bashkua në verën e vitit 2023 nga Osijeku i Kroacisë për 1.2 milionë euro.
