Shefi i diplomacisë, serbe Ivica Daçiq ka pritur në takim shefen e Misionit të OKB-së në Kosovë (UNMIK) Caroline Ziadeh.
Siç thuhet në një njoftim ai “i ka shprehur shqetësimin e tij lidhur me situatën e sigurisë dhe politike në Kosovë, incidentet e shpeshta kundër serbëve dhe lëvizjet e njëanshme të Prishtinës”.
Daçiq ka shtuar se Beogradi është i përkushtuar që dialogu është mënyra e vetme për normalizimin e marrëdhënieve ndërmjet Kosovës dhe Serbisë, por thelbi është respektimi i asaj që është rënë dakord më parë.
“Ai theksoi se ende nuk ka progres në zbatimin e obligimeve të marra nga Kosova, para së gjithash në lidhje me themelimin e Asociacionit të Komunave me shumicë serbe dhe edhe një herë vuri në dukje “vijat e kuqe” të Serbisë në procesin e dialogut, thuhet në deklaratë, përcjell anas.
Me “vijat e kuqe”, zyrtarët serbë nënkuptojnë se Serbia nuk është e gatshme të njohë pavarësinë e Kosovës apo të pajtohet me hyrjen e Kosovës në Kombet e Bashkuara.
“Ndërkohë Ziadeh e falënderoi për mbështetjen ndaj punës së UNMIK-ut dhe shprehu pritjet që bashkëpunimi i mirë do të vazhdojë, thuhet në deklaratë.
