Kështu thuhet në një hulumtim që ka bërë organizata D4D, ku theksohet se përderisa në vitin 2019 shkalla e papunësisë në nivel vendor ishte 25.7%, nga përqindjet më të larta në rajon, gjatë vitit 2020 një numër i madh i qytetarëve dhe bizneseve u goditën për shkak të krizës ekonomike dhe masave parandaluese të miratuara nga Qeveria e Kosovës për parandalimin e përhapjes së pandemisë.
“Përvec ndikimit ekonomik, qytetarët e Kosovës, e sidomos gratë dhe grupet e tjera të cenueshme, përjetuan përkeqësim të kushteve të jetës. Studime të shumta gjatë kësaj periudhe të realizuara nga D4D kanë treguat se barra për gratë u shumëfishua”, thuhet në njoftimin e D4D të postuar në rrjetin social Facebook.
Sipas D4D, ky hulumtim është realizuar gjatë muajit mars 2022 me 1065 respodentë, në pyetjen se “Si ka ndikuar Pandemia COVID-19 në gjendjen tuaj socio-ekonomike?”.
Nga njoftimi është bërë e ditur se 62% e të anketuarve u deklaruan se gjendja e tyre është përkeqësuar.
“Kjo shifër është mjaft shqetësuese, duke pasur parasysh që Pandemia COVID-19 nuk është shpallur akoma si periudhë e mbyllur, dhe rreziku për valë të tjera të pandemisë mbetet akoma kërcënues. Nga të anketuarit, 25,3% janë përgjigjur se nuk ka pasur ndonje ndikim negative apo pozitiv në gjendjen e tyre socio-ekonomike, përderisa 11.2% e respodentëve kanë deklaruar se kushtet socio-ekonomike të tyre janë përmirësuar gjatë kësaj periudhe”, thuhet në njoftim. /teve1.info/
