Finalja e Kupës së Kosovës në futboll, luhet nesër pasdite në stadiumin ‘Fadil Vokrri’. Dy rivalët e vjetër, Prishtina dhe Gjilani, do të sprovojnë forcat në finalen e madhe të kësaj gare, e dyta për nga rëndësia në Republikën e Kosovës.
Trajneri i Prishtinës, Debatik Curri, i cili qysh në vitin e tij të parë në krye të bankinës së kryeqytetasve kërkon trofe, ka folur para duelit me Gjilanin. Sipas tij, finalja me gjilanasit është sfidë shumë e rëndësishme për skuadrën e tij.
Curri thotë se bardhekaltërit nesër hynë në duel me Gjilanin për ta fituar trofeun e Kupës.
“Kjo është ndeshje shumë e rëndësishme për Prishtinën, një finale e cila e përmbyll një vit shumë të mundimshëm dhe me shumë sakrifica. Trofetë kanë qenë prej fillimit objektivi jonë dhe normalisht se nesër do të synojmë që të kurorëzohemi me këtë trofe”, ka thënë Curri për faqen zyrtare të FC Prishtinës.
Sipas tij, përparësia në këtë ndeshjes është në anën e të besuarve të tij pasi që ndeshja do të luhet në Prishtinë.
“Përparësi e Prishtinës në këtë ndeshje është stadiumi “Fadil Vokrri” pasi luajmë para qytetarëve të Prishtinës, para “Plisave” që mendoj se do të jenë shtytje e madhe për neve, për këtë trofe. Skuadra është përgatitur mjaft mirë. Të gjithë lojtarët kanë punuar maksimalisht dhe të gjithë janë të gatshëm që ta përmbyllim këtë vit me një trofe që është i rëndësishëm edhe për sfidat që i kemi pasur gjatë gjithë edicionit”, ka thënë Curri.
Finalja mes Gjilanit dhe Prishtinës fillon në orën 18:00.
