Valët e para të cunamit, të shkaktuara nga një tërmet i fuqishëm në Oqeanin Paqësor, kanë filluar të godasin bregdetin perëndimor të Shteteve të Bashkuara dhe Lindjen e Largët të Rusisë, duke shkaktuar gjendje alarmi dhe evakuime të menjëhershme në disa qytete bregdetare.
Sipas të dhënave nga Administrata Kombëtare Oqeanike dhe Atmosferike (NOAA), valët e para u regjistruan në San Francisko, Kaliforni, në orën 1:12 të mëngjesit sipas kohës lokale.
Agjencia paralajmëron se shkalla e ndikimit ende nuk është e qartë, pasi pritet që valët të shtohen në madhësi me kalimin e kohës, transmeton Al Jazeera.
Shërbimi Kombëtar i Motit ka lëshuar paralajmërime të nivelit të lartë për disa zona në bregun perëndimor të SHBA-së.
Përveç San Franciskos, valë cunami janë raportuar edhe në Seattle, Monterey dhe Eureka, duke përfshirë të gjithë rajonin në një situatë të pasigurt.
Në qytetin Monterey, valët e para u regjistruan në orën 12:48 të mëngjesit. Autoritetet lokale kanë lëshuar urdhra evakuimi për Portin e Monterey-t, Gjirin Breakwater dhe zonat përreth, për të parandaluar rreziqe për jetën dhe pronën.
Tërmeti që shkaktoi këtë cunami ka vënë në alarm të dyja anët e Oqeanit Paqësor. Autoritetet në të dyja vendet vazhdojnë të monitorojnë situatën, ndërsa qytetarëve u kërkohet të ndjekin me përpikëri udhëzimet e emergjencës dhe të qëndrojnë larg zonave bregdetare deri në një njoftim të dytë.
Raportimet pritet të përditësohen në orët në vijim, teksa agjencitë meteorologjike dhe sizmologjike analizojnë zhvillimet dhe rrezikun e mëtejshëm nga cunami./teve1/
