Cristiano Ronaldo është një makineri që nuk ndalet kurrë.
Ylli portugez po vazhdon t’i mahnitë të gjithë me paraqitjet e tij, përkundër faktit se pas pesë ditësh do t’i mbushë 40 vjet.
“CR7” la gjurmë edhe mbrëmë në fitoren e Al-Nassr ndaj Al Raed me rezultat 2:1 në Saudi Professional League.
Ish-futbollisti i Sporting Lisbonës, Manchester Unitedit, Real Madridit e Juventusit e shënoi golin e parë të ekipit të tij pasi e devijoi një goditje të Marcelo Brozovic nga gjuajtja e lirë.
Por, kjo nuk ishte e tëra pasi veterani i sulmit kontribuoi edhe në golin e dytë të mysafirëve duke asistuar për shënuesin Al Boushail.
Me këtë rast, Ronaldo e regjistroi asistimin e 257-të në karrierë.
Përfaqësuesi portugez arriti në 80 kontribute, përfshirë këtu gola dhe asistime në 64 ndeshje të zhvilluara në Saudi Pro League.
Sa u përket golave, pesë herë fituesi i Topit të Artë ka statistika të frikshme.
Ronaldo i ka shënuar 921 gola në karrierë dhe po shkon me hapa të sigurt drejt numrit jubilar prej 1000 golash.
“Është ndjenjë e mirë, por dua më shumë”, deklaroi portugezi mbrëmë pas lojës.
Pesë herë fituesit të Ligës së Kampionëve i nevojiten edhe 79 gola për ta arritur qëllimin e tij.
Edhe ashtu, aktualisht Ronaldo është golashënuesi më i mirë në histori të futbollit.
Krahas 1000 golëshit, ai synon të luajë me Portugalinë në Kupën e Botës 2026, kur do të jetë 41 vjeç.
