Në shtatorin e vitit 1999, Bernard Kushner arriti në Kosovë.
Në cilësinë e përfaqësuesit të OKB-së, Kushner provoi t’i bindte ushtarakët kosovarë për demilitarizimin e UÇK-së.
Krejt këtë takim nga afër, e ndoqi edhe zëvendësi i Kushnerit, James Peter Covey.
26 vite më pas, ky e gjeti vetën në karrigen e dëshmitarit të mbrojtjes në Dhomat e Specializuara në Hagë.
Para trupit gjykues, Covey tha se komandantët e zonave nuk merrnin urdhra nga drejtori politik i tyre.
“Komandantët e tjerë diskutonin mes veti dhe nuk biseduan me Thacin, madje as nuk e shikuan. Isha shumë i befasuar. Z. Thaci më të vërtetë nuk kishte një marrëdhënie kuptimplotë me atë grup të komandantëve të zonave dhe dukej qartë që ata nuk do ta kërkonin udhëzim prej tij apo të merrnin urdhra ose t’i raportonin atij. Nuk kishte komandë të centralizuar, por gjeneral Ceku dukej larg më ndikimin më të madh, por nuk dukej që ishte në pozicion që të merrte vendime pa konsultime”, ka thënë Covey.
Covey tha se gjatë qëndrimit në Kosovë, nuk pati pasqyrë të qartë se kush ishte përgjegjës për rajone të caktuara në UÇK.
“Unë nuk kam pasur asnjëherë një pasqyrë të plotë ose një kuptim shumë të mirë- skemë të mirë të asaj që ushtria do ta quante rendi i luftimeve të UÇK-së për të kuptuar më qartë se kush ishte përgjegjës për një rajon të caktuar dhe kujt i raportonte ky person i caktuar”, është shprehur tutje Covey.
Duke iu përgjigjur pyetjeve të avokatit Mishetiq, Covey shtoi se ishte vet Thaçi që dënoi aktet e intolerances etnike në Kosovë.
“Një përqindje e madhe e romëve jetonte ndërmjet fshatrave etnik shqiptarë dhe i dërgonin fëmijët e tyre në shkolla shqiptare, por politikisht mbështetnin autoritetet serbe në Kosovë. Për shkak të kësaj ndasie, romët ishin veçanërisht në fokus të shqiptarëve etnik të cilët ndjeheshin të shfrytëzuar prej tyre. Në zonën e Prishtinës, romët rekrutoheshin në numër të madh nga MUP-i dhe armata jugosllave. Ndonjëherë, në trysni dhe nën presion dhe shpeshherë angazhimi i tyre bëhej në mënyrë vullnetare për të mbushur vakumin që ishte bërë nga zhvendosja dhe dislokimi i forcave në zonat kufitare dhe në pikat e tjera të nxehta”, ka përfunduar Covey.
Dëshminë e tij Covey, do ta vazhdojë edhe të mërkurën duke iu përgjigjur për pesë orë të tjera pyetjeve të Prokurorisë Speciale.
