Cole Palmer i Chelseat pritet të jetë jashtë për më shumë javë për shkak të një problemi të vazhdueshëm në ijë, duke e bërë një rikthim të pamundur deri në nëntor.
Sulmuesi anglez ka humbur tri ndeshjet e fundit kundër Brighton, Benfica dhe Liverpool për shkak të këtij problemi, pasi u nxor jashtë nga fusha pas vetëm 21 minutave lojë, në ndeshjen e humbur 1-2 ndaj Manchester United më 20 shtator.
Më pare, ai kishte humbur ndeshjet kundër West Ham dhe Fulham në gusht, pas dëmtimit në Kupën e Botës për Klube. Ai është kufizuar në vetëm katër paraqitje në të gjitha garat deri më tani këtë sezon, dhe vetëm një herë ka luajtur 90 minuta të plota në Premier League, javën e parë.
Madje ai nuk u grumbullua në skuadrën e Anglisë për këtë pushim ndërkombëtar dhe trajneri Thomas Tuchel pranoi se problemi i lojtarit është shumë i rrezikshëm për t’u bërë kronik. Objektivi është që Palmer të kthehet për ndeshjen në Tottenham më 1 nëntor.
Ai pritet të humbasë udhëtimin e Chelsea në Nottingham Forest, një ndeshje të Champions League kundër Ajax, si dhe përballjet kundër Wolves dhe Sunderland në kampionat. Ndërkohë që edhe prania në kombëtare është në dyshim.
