Filmi biografik historik për shpikësin e bombës atomike “Oppenheimer”, fitoi Oscarin si filmi më i mirë nga Akademia Amerikane e Arteve dhe Shkencave të filmit, gjatë një ceremonie të dielën në Los Anxhelos.
Oppenheimer, i Christofer Nolan arriti të fitojë gjithsej shtatë çmime Oscar, përfshirë atë për aktorin më të mirë, çmim të cilin e mori irlandezi Cillian Murphy, i cili luante rolin e fizikanit teorik Robert Oppenheimerit- liderit të përpjekjeve amerikane në vitet ’40 për ta krijuar një armë e cila do t’i jepte fund Luftës së Dytë Botërore.
Pasi mori çmimin, Murphy u shpreh shumë i kënaqur, ndërsa këtë Oscar tha se ia dedikon paqebërësve kudo në botë.
“Jam shumë i kënaqur. Filmi është kaq i veçantë për mua. Ky është një film që është provokues dhe sfidues dhe ka kaq shumë njerëz që duan ta shohin atë. Ne e bëmë një film për njeriun i cili e krijoi bombën atomike dhe ne po jetojmë në botën e Oppenheimerit, qoftë për mirë apo për keq. Këtë çmim do të doja t’ua kushtoja paqebërësve kudo në botë, ka thënë Cillian Murphy-aktor, fitues i çmimit OSCAR për aktorin më të mirë.
Oppenheimer pati gjithsej 13 nominime, më shumë se çdo prodhim tjetër.
Ndërkohë, çmimi për aktoren më të mirë këtë vit shkoi për Emma Stone për interpretimin e saj në komedinë groteske “Poor Things”.
E filmi më i mirë dokumentar u vlerësua “Njëzet ditë në Mariupol” nga Mstislav Çernov, Michelle Mizner dhe Reni Aronson-Ratha.
Ai tregon përvojat e gazetarëve të agjencisë Associated Press të cilët kaluan rreth tri javë në qytetin port ukrainas në fillim të vitit 2022, në një kohë kur u rrethua nga forcat ruse.
Ndërkohë Britania e Madhe e fitoi Oscarin për filmin më të mirë ndërkombëtar “The Zone of Interest.
Ceremonia e ndarjes së çmimeve, e cila zgjati gati tri orë e gjysmë, u drejtua nga Jimmy Kimmel.
