Çmimet e bakrit në SHBA u rritën në nivele rekord pas njoftimit të Donald Trump për një tarifë 50% ndaj këtij metali, si pjesë e përshkallëzimit të fundit në politikat e tij tregtare.
Gjatë një mbledhjeje të kabinetit të martën, Trump deklaroi: “Sot po bëjmë bakër”, duke propozuar një tarifë të re mbi importet e metalit.
Ai gjithashtu paralajmëroi një taksë kufitare deri në 200% për produktet farmaceutike, që mund të hyjë në fuqi brenda një viti ose një viti e gjysmë.
Ky zhvillim shtoi paqartësinë rreth qasjes së tij të paparashikueshme ndaj tarifave, pasi një ditë më parë kishte dërguar letra zyrtare që vendosin tarifa deri në 40% për mbi një duzinë shtetesh, me zbatim nga 1 gushti – ndryshe nga data e mëparshme e raportuar, 9 korriku.
Megjithëse Trump tha se afati i ri “nuk është 100% i prerë”, më pas ai shkroi në Truth Social se “nuk do të ketë asnjë zgjatje” përtej gushtit.
Në një tjetër postim të martën në mbrëmje, Trump premtoi të zbulojë të mërkurën në mëngjes detajet për tarifat ndaj shtatë vendeve të tjera, me më shumë informacione që do të publikohen gjatë pasdites.
Pas këtyre komenteve, kontratat e ardhshme të bakrit në SHBA u rritën me mbi 10%, duke arritur një rekord prej 5.682 dollarësh për paund, përpara se të binin lehtë në 5.662 dollarë.
Në të kundërt, në tregjet ndërkombëtare, çmimet ranë – me Bursën e Metaleve të Londrës që pa një rënie deri në 2.4% në fillim të tregtimit, për t’u stabilizuar më pas në 9.653 dollarë për ton, raporton The Guardian.
Ndërkohë, Bashkimi Evropian pret një letër nga Trump brenda 48 orëve të ardhshme për marrëveshjet tarifore. Zyrtarë në BE besojnë se një marrëveshje kornizë do të mund të arrihet këtë javë, duke përfshirë sektorë si makinat, çeliku dhe pajisjet mjekësore.
Presidentja e Komisionit Evropian, Ursula von der Leyen, u tha eurodeputetëve se është e përgatitur për të gjitha skenarët në rast se bisedimet dështojnë: “Ne mbrojmë interesat tona, veprojmë me mirëbesim dhe jemi të gatshëm për çdo të papritur.”
Ndërkohë, Sekretari Amerikan i Tregtisë, Howard Lutnick, tha për CNBC se tarifat për bakrin mund të hyjnë në fuqi në fund të korrikut ose në fillim të gushtit.
Ekspertët paralajmërojnë se tarifat mund të rrisin kostot në sektorë kyç të ekonomisë amerikane, për shkak të përdorimit të gjerë të bakrit në teknologji, automjete, ndërtim dhe energji të rinovueshme.
Trump paralajmëroi gjithashtu se brenda vitit të ardhshëm mund të vendoset një taksë e re prej 200% për importet farmaceutike, si dhe tarifa të tjera për çipat kompjuterikë dhe produkte të tjera teknologjike.
“Do t’u japim njerëzve rreth një vit, një vit e gjysmë për të ardhur dhe pas kësaj do t’u vendoset tarifa nëse duhet të sjellin produktet farmaceutike në vend, me një normë shumë të lartë, si 200%”, tha ai
