Skuadra nga Rumania, Cluj po synon ta forcojë repartin e sulmit për sezonin e ardhshëm me një futbollist nga Superliga e Kosovës.
Mediumet rumune kanë bërë të ditur se Cluji po synon sulmuesin e skuadrës së Malishevës, Assane Diatta.
Bëhet e ditur se Diatta po pëlqehet shumë nga Cluji, i cili thuhet se tashmë ka kontaktuar agjentët e futbollistit nga Senegali, të cilin po e kërkon edhe Kasimpasha në Turqi.
Diatta muajin e ardhshëm është lojtar i lirë pasi i skadon kontrata me Malishevën, ekip që e transferoi verën e shkuar.
26-vjeçari në sezonin e tij të parë në Kosovë, ka treguar paraqitje të mira te Malisheva, ku ka shënuar 11 gola dhe ka bërë 6 asistime në 31 ndeshje të luajtura në të gjitha garat.
Para se ti bashkohej Malishevës, Diatta ka luajtur te skuadra e Gostivarit në Maqedoninë e Veriut.
