Mbrojtësit Armend Thaqi e Lumbardh Dellova pritet të jenë futbollistët e radhës që do të largohen nga Ballkani për të vazhduar karrierën në Rumani.
Mediumet rumune kanë bërë të ditur se skuadra e Clujit ka shprehur interesim për transferimin e Thaqit dhe Dellovës gjatë afatit kalimtar të verës.
Madje, raportohet se Cluji edhe zyrtarisht është në negociata me dy futbollistët, të cilëve u skadon kontrata në fund të këtij edicioni.
Në fakt, thuhet se Thaqi parimisht ka arritur marrëveshje personale me ekipin rumun, ndërsa me Dellovën po vazhdojnë negociatat për ta bindur të transferohet në Rumani.
Si Thaqi ashtu edhe Dellova po kërkohen me ngulm nga trajneri i Clujit, Dan Petrescu që po i sheh si përforcime të duhura për edicionin e ardhshëm.
Thaqi 31-vjeçar, i cili luan si mbrojtës i krahut të djathtë, është pjesë e Ballkanit prej vitit 2020 dhe me ekipin nga Suhareka ka fituar dy tituj kampioni të Kosovës.
Ndërkohë, edhe Dellova ka dy tituj kampioni me Ballkanin dhe është pjesë e ekipit prej janarit të vitit 2021. 25-vjeçar aktivizohet në qendër të mbrojtjes, ndërsa ka edhe 8 paraqitje me Kombëtaren e Kosovës.
Këtë edicion, Thaqi ka 1 gol e 7 asistime në të gjitha garat, ndërsa Dellova ka realizuar 3 gola dhe ka bërë 2 asistime për Ballkanin.
Karrierën nga Ballkani në futbollin rumun para Thaqit e Dellovës, e kanë vazhduar Ermal Krasniqi e Albion Rrahmani që janë pjesë e Rapidit të Bukureshit.
Në të vërtetë, Krasniqi në fillim të vitit 2023 u pat transferuar te Cluji përpara se në fillim të këtij viti t’i bashkohet Rapidit.
