Pas largimit të Lindon Emërllahut nga Cluji, skuadra rumune duket se ka gjetur zëvendësimin e tij dhe atë në Superligën e Kosovës.
Bëhet e ditur se Cluji ka shfaqur interesim për mesfushorin Etnik Brruti, i cili është pjesë e skuadrës së Malishevës.
Brruti po shihet si zëvendësim ideal për Emërllahun, i cili ditë më parë u transferua në Ukrainë te skuadra Polissya Zhytomur për gati 2 milionë euro.
Megjithatë, thuhet se Cluji duhet të ofrojë të paktën 800 mijë euro për ta bindur Malishevën në lirimin e tij muajin tjetër, ndonëse ekipi kosovar kërkon të ruajë edhe 15 për qind të kartonit të tij.
Brruti ka kontratë me Malishevën deri në fund të këtij sezoni, pra deri në qershorin e vitit 2026 dhe skuadra kosovare nuk dëshiron ta humb atë pa kompensim.
21-vjeçari këtë sezon ishte ndër lojtarët kryesor të Malishevës, ekip që stinorin vjeshtor e ka përfunduar në pozitën e pestë në tabelë me 27 pikë, gjashtë më pak se Ballkani që dimëron si kampion.
Në 17 ndeshje të luajtura këtë sezon për Malishevën, Brruti ka shënuar 4 gola dhe ka bërë 3 asistime në të gjitha garat.
