Shtetet e Bashkuara të Amerikës tashmë i kanë dhënë dritën e jeshile Gjeneralit Uesley Clark të japë dëshminë në gjykimin ndaj Thaçit dhe të tjerëve.
Clark që është dëshmitari i mbrojtjes së ish-krerëve të Ushtrisë Çlirimtare të Kosovës, është ndër dëshmitarët e fundit në Hagë.
Në parashtrimin e mbrojtjes, thuhet se Clark do të jep dëshmi rreth përpjekjeve të NATO-s për zbatimin e marrëveshjes së tetorit në vitin 1998 mes Holbrooke dhe Millosheviq.
Monitoruesit e punës së Speciales, vlerësojnë se dëshmia e tij është e rëndësisë së veçantë për shkak të përvojës së tij diplomatike dhe ushtarake.
“Eksperienca dhe integriteti i pakontestuar i tij bëjnë që dëshmia e tij të jetë e besueshme pasi ajo varet nga faktet e pamohueshme dhe të paanshme për shkak të pozitave të tij që ai i ka mbajtur në sferën ushtarake dhe diplomatike, kështu që ai mund të jep fakte të pamohueshme sa i përket strukturës dhe funksionimit të UÇK-së si dhe sjelljen dhe rolin e të akuzuarve gjatë periudhës sa ai ka shërbyer edhe në Kosovë”, deklaroi Blendina Veliqi nga IKD.
Këtë e ka mirëpritur edhe avokati i licencuar i Speciales, Artan Qerkini i cili thotë se Clark ka qenë protagonist i të gjitha zhvillimeve nga viti ‘98 deri në përfundim të luftës.
“Është me rëndësi se do të dëshmojë një dëshmitar i cili ka kredibilitet të lartë moral dhe profesional dhe i cili ka mbajtur poste jashtëzakonisht të rëndësishme në NATO. Prandaj edhe dëshmia e tij është e një rëndësie të veçantë dhe unë mendoj se ai do të japë shumë fakte që do të shkojnë në favor të zbulimit të së vërtetës në këtë çështje penale”, tha Qerkini.
Sipas tij, krahasuar me dëshmitë e paraqitura nga Zyra e Prokurorit të Specializuar, dëshmia e nivelit të lartë si Clark do të ketë efekt pozitiv në epilogun e vendimit final.
“Nuk ka dilemë se kredibiliteti i dëshmitarëve të mbrojtjes është shumë më i lartë se kredibiliteti i dëshmitarëve të Prokurorisë dhe natyrisht Gjykata kur e vlerëson një dëshmi të dëshmitarit në radhë të parë e vlerëson besueshmërinë e dëshmitarit pastaj e vlerëson deklaratën e tij në kuptim koherent dhe logjik dhe se deklarata e tij a përputhet me provat e tjera”.
Nga mbrojtja po ashtu thuhet se Clark do të përshkruaj edhe ndërveprimet me UÇK-në, delegacionin kosovar në Rambuje e në veçanti edhe Thacin për të cilin ka thënë se nuk ka pasur kontroll mbi UÇK-në.
