Pronat e të dyshuarit për krime të shumta, Millan Radoiçiq, janë bastisur nga Policia e Kosovës, mëngjesin e së premtes, gjatë një aksioni që u zhvillua në pesë lokacione të ndryshme në tri komunat veriore të Republikës.
Nga prokuroria kanë konfirmuar se ky aksion është bërë me kërkesë të Prokurorisë Speciale e me urdhër të gjykatës kompetente.
Pronat e Radoiçiqit që u bastisën janë: banesa, restorant i cili është në pronësi të gruas së tij dhe një vilë luksoze afër liqenit të Ujmanit. Kontrolle janë zhvilluar edhe në Spitalin e Mitrovicës së Veriut.
Pas aksionit, Policia e Kosovës dhe Prokuroria Speciale kanë njoftuar se operacioni kishte të bënte me sulmin terrorist që ndodhi të dielën si dhe njoftuan për provat materiale të sekuestruara.
Pas realizimit të urdhër kontrollit, në cilësi të provave materiale, në pronat e të dyshuarve janë sekuestruar: 2 automjete të tipit ‘mercedes’, argjend 4.84 kg, 2 motorë 4X4, 1 barkë-anije, 7 DVR, 2 pllaka antiplumb me dy mbrojtës, 3 thika, 2 rutera, 2 çelësa të veturave, 5 gëzhoja, 1 dron, 5 USB, 1 kamera GoPro- SSD, 1 video kamerë me kartelë, 1 shënjestër optike, 1 sprej, 7 telefona celularë.
Po ashtu, Prokuroria Speciale do të parashtrojë urdhrin ndalues në gjykatën kompetente për sekuestrim të një vile buzë liqenit të Ujmanit, një penthause dhe një lokali.
Këtë mëngjes, Policia e Kosovës me anë të një komunikate ka njoftuar në lidhje me këtë aksion për të cilin tha se është në koordinim të ngushtë me KFOR-in dhe EULEX-in.
Për aksionin e sotëm ka reaguar edhe ministri i Punëve të Brendshme, Xhelal Sveçla, i cili edhe ka postuar video nga pronat e bastisura.
“Policia e Kosovës në zbatim të urdhëresës së gjykatës, sot është kryer bastisje në banesën e Milan Radojçiq, në vilën tij në Liqenin e Ujmanit, në një aneks/ngrohtore të Spitalit të Mitrovicës si dhe në shtëpinë e Vladimir Radojeviq i njohur me nofkën ‘Mami’. Ne e kemi dëshmuar edhe me pamje dhe me prova të tjera që udhëheqësi i këtij grupi ishte Milan Radojçiq. Edhe nga pamjet që po shihen, dëshmohet se nuk bëhet fjalë për asnjë “luftëtar lirie” por për një Pablo Escobar të rajonit. Nën maskën e mbrojtësit të qytetarëve ai dhe bashkëpunëtorët e tij u bënë multi milionerë në kurriz të ligjit, shtetit dhe qytetarëve të tjerë”, tha ministri i Punëve të Brendshme, Xhelal Sveçla.
Tanimë krimineli Millan Radoiçiq e ka pranuar edhe publikisht se ka qëndruar prapa sulmit terrorist që ndodhi të dielën e 24 shtatorit, ku mbeti i vrarë rreshteri Afrim Bunjaku.
