Ish-zyrtarja e Bashkimit Evropian në Kosovë, Albina Nura, po akuzohet nga Prokuroria Speciale, se përmes disa kontratave i ka shkaktuar dëm prej 500 mijë eurove, buxhetit të BE-së.
Për këtë rast, sot ka vazhduar gjykimi, me Nurën që e ka dhënë mbrojtjen e saj.
Sipas aktakuzës, Nura në mënyrë të kundërligjshme ka përgatitur dokumentacion me qëllim të rritjes së vlerës së një kontrate, duke angazhuar punonjës të administratës civile dhe punonjës të tjerë shtetëror në cilësi të ekspertëve junior, në kundërshtim me kushtet e përgjithshme të kontratës.
Një gjë e tillë, u kundërshtua nga e akuzuara.
“Unë nuk e kam nënshkru asnjë dokument për këta ekspertë në të cilët thirret aktakuza. Vet raporti i Olaf-it, që është prova numër një e prokurorisë, thotë se këta ekspertë janë aprovu e janë nënshkru prej zotit Kristof Shtok”, ka thënë Nura.
Ajo shtoi, se puna e saj ishte vetëm verifikimi teknik për këta ekspertë në bazë të CV-ve të tyre, termave të referencës, deklaratat e disponueshmërisë dhe aprovimet e ministrisë përkatëse.
“Krejt këto dokumenta kanë qenë në file, jam 100% e sigurt, se nuk e kisha bë atë verifikim teknik nëse nuk kishin qenë në file këto dokumenta. Nuk e kisha bë atë verifikim teknik nëse nuk e kisha pasë email prej zonjës Angelique, që unë duhna me kry këtë procedurë për ekspertat e projektit Tray. Në email të zonjës Angelique qartë ceket se unë kam detyrën e vlerësuesit teknik, ndërsa për të gjitha çështjet tjera që kanë të bëjnë me projektin Tray, zonja Angelique ka me u marrë”, është shprehur tutje Nura.
Nura akuzohet edhe për konflikt të interesit, për shkak se kompanitë në të cilat ajo ishte aksionare kishin fituar projekte nga BE-ja.
Mirëpo, ajo tha se kontrata e saj e punës në zyrën e BE-së në Kosovë, nuk e obligonte që të lajmëronte punët e me pagesë jashtë orarit të punës.
“Kërkund në kushtet e punës, as në kontratën time, që është pjesë e këtij dokumentacioni, nuk më është kërkuar që të raportoj investime tjera të miat dhe të familjes time”, ka theksuar Nura.
Aktakuza ndaj Albina Nurës është ngritur më 18 maj 2021, dhe tashmë gjykimi në këtë rast ka prekur fundin.
