Në kohën e luftës ishte 15 vjeçar.
Artan Krasniqi, si i mitur i ishte nënshtruar maltretimeve fizike e psiqike nga forcat serbe.
Madje, atë e kishin detyruar që në gjendje të rënduar, ta mbante në shpinë trupin e një shqiptari të ekzekutuar po ashtu nga forcat serbe.
“Me sa më kujtohet Dragani më ka thanë “kape këtë terrorist dhe tregoju se çka ka me ju gjetë”, ka thënë Krasniqi
Gjithë përjetimet e tij, Krasniqi i rikujtoi në rigjykimin e Dushko Arsiq, i akuzuar për krime lufte në rrethin e Prishtinës.
Krasniqi në që procedurë ka status të dyfishtë, si i dëmtuar dhe si dëshmitar, tregoi se në kujtesën e tij e ka të ruajtur qartë fytyrën e të akuzuarit.
“20 prill 1999, ditë e marte ka qenë, kohë lufte. Në bazë të përjetimeve që i kam përjetu shpirtërisht, këtë fytyrë nuk e harroj asnjëherë”, është shprehur tutje Krasniqi
Ai tregoi momentin kritik me të akuzuarin, nga edhe ia kishte kuptuar emrin.
“Ka qenë i vetmi që ka qenë përmas shpinës teme, i akuzuari Dushko Arsiq, që gjendet tash në këtë sallë. Dhe unë kam qenë i shtrirë aty, si pjerrtazi, i rrëzum kam qenë faktikisht kur ka kërsit kallashi prapa shpinës teme që veshët më kanë kërsit. Kryt e kam kthy edhe domethënë e kam pa që është i vetmi person. Dhe një pjesëmarrës i tyre ka thënë “flet serbisht” sigurisht ka deshtë më m’myt edhe mu mas shpine. Qaty ia kam mësu emrin”, ka theksuar Krasniqi.
Arsiq vitin e kaluar ishte dënuar me 13 vite burgim nga Gjykata Themelore në Prishtinë, por që lënda u kthy në rigjykim.
Sipas aktakuzës, Arsiq bashkë me persona të tjerë, është përgjegjës për keqtrajtimin e civilëve shqiptarë, plagosje e vrasje.
