Janë në paraburgim që nga viti 2024.
Prej atëherë, Enes Ay dhe Hajrullah Brcan janë dy të dyshuarit kryesor për vrasjen e të riut Auron Thaqi, në korrikun e vitit 2024.
I ndjeri vdiq pas plagëve të marra nga therja me thikë. Pas aktit, Enes Ay dhe Hajrullah Brcan akuzohen se e hodhën viktimën nga një veturë në lëvizje.
Procesi ndaj dyshes së akuzuar ka arritur gati në fund të dëgjimit të dëshmitarëve.
Vendi ku ulej zakonisht nëna e Auron Thaqit, në seancën e sotme ishte bosh.
Por ajo u përfaqësua nga avokati i saj.
Pala e dëmtuar vazhdon të insistoj në dëgjimin e një dëshmitari që ndodhet jashtë vendit dhe dëgjimi i të cilit po dështon qe disa seanca.
“Ky ka qenë kryesori që ka zbuluar rastin”, tha përfaqësuesi i pales së dëmtuar, Esat Gutaj.
Trupi gjykues i dha leje përfaqësuesit të palës së dëmtuar që të bisedojë me dëshmitarin, Andi Isufaj, në lidhje me gatishmërinë e tij për të dëshmuar.
“Është i gatshëm të bisedojë më Gjykatën drejtpërdrejt përmes telefonit ose nëse mundet me marrë leje me ardhë këtu vet personalisht, pas një muaji. Tha që jam edhe më tutje i kërcërnuar se din që kemi pas një mosmarrëveshje në koridor”, deklaru Gutaj.
Për këtë kërcënim, reagoi mbrojtja e të akuzuarve, duke kërkuar hetim nga organet kompetente.
“Në qoftë se ky rast nuk është hetuar nga prokuroria se kush është kanosur, i frikësuar dhe në çfarë rrethana do ta njoftoj personalisht kryetarin e Gjykatës, Këshillin Prokurorial për mosmarrjen e veprimeve nga ana e Gjykatës dhe Prokurorisë”, tha avokati i Hajrullah Brcan, Fanol Krasniqi.
Meqë Gjykata nuk ishte e përgatitur që deklarimi i këtij dëshmitari të bëhet në formën online, u vendos që i njëjti të dëgjohet në formën fizike në seancën e radhës që do të mbahet në muajin korrik.
Përpos tij, avokati Gutaj propozoi edhe dëgjimin e hetuesit policor që ka trajtuar rastin që nga fillimi.
Ai argumentoi se për çfarë është e rëndësishme dëshmia e tij.
“Zbulimin e rastit, ngase kemi edhe një person tjetër që është i paarritshëm, i cili e ka la, e ka pastru kerrin. Nga bisedat telefonike përshkruan gjakun në veturë”, tha Gutaj.
Kjo nuk u mirëprit nga palët tjera në procedurë.
“Nuk e shoh të arsyeshme që një hetues i çështjes të vijë dhe të deklarohet lidhur me atë se si është zbuluar rasti. Sepse kjo në të ardhmen, konsideroj se do të ndikojë në pasigurinë e qytetarëve që të shkojnë para organeve policore për ta lajëmruar një rast ose të japin informata për zbulimin e kryerësve të veprave penale”, tha prokurore Ervehi Gashi.
Në seancën e radhës pritet të dëgjohen dëshmitarët e fundit në këtë proces gjyqësor, për të vazhduar më pas me administrimin e provave.
