Pasditen e djeshme, u raportua ndalimi i artistit të njohur Gjesti për “armëmbajtje pa leje”, por Prokuroria e Prishtinës ka konfirmuar edhe dy akuza të reja: “Kanosje” dhe “Asgjësim apo dëmtim i pasurisë”.
Çfarë ndodhi dje? Sipas burimeve të ‘Prive By Liberta Spahiut’, situata ka dalë jashtë kontrollit gjatë një përballjeje në zyrat e kompanisë “Onima”, e cila menaxhon të drejtat e tij digjitale. Në gjaknxehtësi e sipër, gjatë debatit raportohet se është demoluar një kompjuter i zyrës, çka ka detyruar drejtuesit të lajmërojnë menjëherë policinë.
Tensionet mes artistit dhe kompanisë kishin nisur që gjatë verës. Gjesti e ka akuzuar publikisht “Onimën” për padrejtësi, duke u shprehur se po i mbanin peng “djersën” dhe po e pengonin të publikonte këngë të reja. Nga ana tjetër, kompania pretendon se kontrata është e ligjshme dhe se artisti po përdorte presionin publik për t’u shkëputur nga marrëveshja pa shkuar në gjykatë.
Pas incidentit të djeshëm dhe denoncimit, ndaj artistit është caktuar masa e ndalimit prej 48-orësh.
