Gjyqi për korrupsion ndaj ish kryeshefit të Korporatës Energjetike të Kosovës, Nagip Krasniqi, ka vazhduar me dëgjim të dëshmitarëve.
Radhën e pati të hënën, Edmond Nulleshi, i cili në periudhën qershor-shtator 2022 kishte mbuluar detyrën e drejtorit operativ sa i përket menaxhimit të kapaciteteve dhe shitblerjes së energjisë elektrike.
Në këtë kontekst, ai shpjegoi se si bëhej tregtimi i energjisë elektrike.
“Procesi i tregtimit zhvillohej përmes ankandeve ditore apo në bazë të nevojave kurdo që ka pasë tepricë të energjisë elektrike, dhe kurdo që kishte nevojë të importohej energjia elektrike nga KEK, kryesisht gjatë periudhave kur ndonjë njësi kishte rënë nga prodhimi në mënyrë të paplanifikuar. Tregtimi zhvillohej përmes ankandeve, me ç’rast çdo herë kur kishte nevojë tregtimi, ftesa iu dërgohej të gjitha palëve që KEK kishte nënshkruar kontratë gjenerale”, është shprehur Nulleshi.
Nga periudha e aplikimit të tregtimit përmes ankandeve, Nulleshi potencon se KEK nuk kërkonte licenca nga Zyra e Rregullatorit për Energji.
“Kam kuptu se që nga koha kur kishte fillu tregtimi përmes këtyre ankandeve që do të thotë nga 2018 e këtej, Korporata Energjetike e Kosovës nuk kërkonte licencim nga ZRRE për t’i përfshirë këto palë në proces të tregtimit”, ka thënë tutje Nulleshi.
Me kontratë gjenerale me KEK, Nulleshi theksoi se kompania “HSE” ishte që nga viti 2018.
Ndërkaq, licencimi të cilin e kërkonte ZRRE, dëshmitari thotë se ishte paraparë përmes ligjit për energjinë elektrike të vitit 2016.
“Kompania “HSE” kishte kontratë të nënshkruar gjenerale me KEK-un, datën nuk e di saktë por më duket ka qenë viti 2018. Me sa kam njohuri Ligji në të cilin është thirrë ZRRE, n’bazë të cilit kërkohet licencimi, ka hy në fuqi në vitin 2016. Gjithashtu edhe procedura e trajtimit e aprovuar nga ZRRE ku kërkohet licencimi, ka hy në fuqi në vitin 2013. I bie se baza ligjore ka ekzistu e njëjtë si në vitin 2022”, theksoi Nulleshi.
Një muaj para se Nulleshi ta merrte detyrën e drejtorit të operativës, ZRRE kishte filluar porcesin e monitorimit të KEK, sa i përket tregtimit pa licenca.
Gjatë këtij procesi, Nulleshi thotë se janë shkëmbyer shkresa, për të cilat njohuri dhe miratim gjithmonë ka dhënë kryeshefi i KEK-ut.
“Shkëmbimi i shkresave dhe shqyrtimi i bazës ligjore të nevojës për licencim apo për parandalim dhe ndalim të tregtimit me kompani të palicencuara të cilat ZRRE-ja pretendonte se kishte të drejtë t’i bënte, ka pasë takime, ka pasë shkresa e opinione ligjore të cilat janë dërgu e janë kthy prapa. Me sa është potencu nga ana e KEK-ut se do të vazhdojë dhe ka vazhduar me procesin e tregtimit njëjtë si para kërkesës së ZRRE-së, deri në qartësimin ligjor”, ka përfunduar Nulleshi
Tutje, në dëshminë e tij, Nulleshi tha se përmes këtij monitorimi të ZRRE-së ishin evidentuar shkeljet ligjore të KEK në tregtimin e energjisë elektrike me kompani të palicencuara.
Ky ishte dëshmitari i radhës i Prokurorisë Speciale, në të cilin mbështetet edhe aktakuza e saj ndaj Nagip Krasniqit për keqpërdorim të detyrës zyrtare, duke ia mundësuar tregtimin e energjisë “Holding Slovenske Elektrane”, në kundërshtim me Ligjin për Energjinë Elektrike dhe Ligjit për Rregullatorin e Energjisë.
